Ramri ven uluk a ngai e

Mizorama Customs depart-ment chuan tun hnai khan Seling-ah rangkachak Kg 13.998 an man a, hei hi cheng nuai 427 vel hu a ni. Rangkachak hi Zokhawthar maxi cab hmangin Aizawla phurh tum a nihlaiin an man ta a ni.

Tun hnaiah rangkachak tam tham tak bo chhui mek a ni a, sipai officer lian, politician leh supplier leh mi dangte man an ni tawh. He rangkachak ruk bo leh insuamna hi a len tham em avangin tun hnaia rangkachak Kg 14 dawn man pawh hian sawi zui a hlawh mang lo a, Mizo mipui harh a ngai e.

Kan ram hian hetiang smuggling thil hi ngaiah kan nei mai ang tih a hlauhawm a, rangkachang cheng nuai 400 chuang hu an man pawh ngaih-sak mang loa min siam turin cheng vaibelchhe 14.4 hu rangkachak chu Aizawl daiah ruk bo a ni. Heti zat zet bo pawh hmuh a la nih loh avang hian tuna an rangkachak man hi tam tham hle mah se sawi zui a hlawh lo a, hei hi ngaih tiṭha lo lai tak chu a ni.

Ruihhlo an tawlh ṭan tirh kha chuan ruihhlo tlem tham deuh man pawh kha 'news' a tling a, tunah chuan ruihhlo mante chu ngaiah kan nei ta der mai a, sorkar pawhin ngaiah a nei a ang hle. Ruihhlo kalkawng hre chiangtu tur chu Excise leh Police lam pawh hi an ni ang a, anni lamin a lo luhna lam veng tawh loa a lo luh hnua an buaipui chauh tawh avang hian ruihhlo hi chu tam lo thei a ni lo.

Smuggling thil chi hrang dangte pawh hi a kalkawnga kan dan pin loh chuan Mizoramah hian a luh belh zel dawn tihna a ni a, hei vang hian Myanmar leh Mizoram inkalpawhna ramrite hi tun aia uluka ven a hun ta. Mizoram hi dan loa thil tawlh rukna kalkawng lian takah a chang chho mek niin a lang a, ngaih a ṭha lo a, thil pawi lian zawk a thlen hmain sorkar hian ramri hi veng uluk rawh se.