Phalna nei loa vawksa lâk luh

Mizoran Pig Farmers Association-in state dang aṭanga vawksa (frozen pork) lâk luh an duh loh avangin frozen vawksa zuartute zinga mi Mizoram Pig Producers' Cooperative Federation Limited (PIGFED)-in vawksa an zawrhna dawr kawtah tun hnai khan frozen vawksa an hâl. PIGFED lamin vawksa an lak luh loh thu leh frozen vawksa an zawrhte chu a la luttu (stockist) aṭanga an lâk chhâwn an zawrh a nih thu an sawi ve thung.

Hetih lai hian, AH&Vety department hotute chuan Vety Minister hoa ṭhutkhawmnaah, tun dinhmunah state páwn aṭanga frozen vawksa la lut tura phalna (permit) pek an neih loh thu an sawi a; Vety Minister-in Mizorama vawk vulhtute sorkarin an ngaih pawimawh thu a sawi bawk.

Vawk leh vawksa chungchanga tun hnaia thil thleng leh sorkar hotute thil sawi aṭanga lang ta chu - state páwn aṭangin frozen vawksa la lut ṭhin an awm ngei a, mahse, chu'ng mite chu sorkar aṭangin phalna pek an ni lo a, phalna nei loin anmahni thuin an la lut mai ṭhin tih hi a ni.

State páwn aṭanga vawksa lâk luh hi Mizoram tan a ṭha zawk thei a, a ṭha lo zawk thei bawk a, ngaihdan a inang lo thei ang. A ṭhatna leh ṭhat lohna a awm ve ve bawk àwm e.

Eng pawh ni se, state páwn aṭanga frozen vawksa la luttute'n dan ang taka thil an ti lo leh phalna nei loin an la lut tih Vety officer-te'n an sawi hi sorkar thuneitute'n an ngaimawh tur a ni a, a bawhzui tur a ni. Dan lo leh phalna nei loin vawksa an la lut ngei a nih chuan hrem theih an nih ngei a rinawm.

Sorkar hian state páwn aṭangin frozen vawksa lâk luh a phal a nih chuan vawksa la luttute chu dan ang taka thil ti turin a thunun tur a ni a, phalna nei loa la lutte pawh a hrem ngam tur a ni. Lâk luh a phal lo a nih erawh chuan, tuna la lut ṭhintute chungah pawh action a la ngam ngei tur a ni bawk.