Mizoram sorkar sum pûk chungchang

Mizoram sorkar chuan open market borrowing (OMB) hmangin loan cheng vbc. 200 a pûk a tum a, a pûk a nih chuan sorkar kum kal mek 2024-25 chhunga OMB-a sum a pûk hmasak ber tur a ni.

Sum pûk tumah hian RBI chuan OMB hmanga Mizoram sorkarin sum pûk tur a zawn thu March 24, 2024 khan a tarlang a, sum puktir duh tan May 28, 2024 thleng chhànna hun a hawng.

Mizoram sorkar chuan financial year 2024-25 chhunga OMB hmanga sum pûk tur zat a ruahman chu cheng vbc. 1,170 a ni a, ruahman zat hi pûk ngei tur tihna a ni lo thung.

OBM hmang emaw, thil dang aṭang emawa Mizoram sorkarin sum a pûk hi tun hma aṭang tawha tih ṭhin a ni a, eng party pawhin sorkarna chelh se, an tih ziah ṭhin a ni. Chutih laiin, eptu party apiangin sorkar leh sorkar lai party-te an beihna hmanraw pakhat a ni reng bawk.

Mizoram sorkar hi thawh chhuah nei tlem, sorkar laipui suma innghat nasa tak a ni a, chu chu mipui náwlpuiin an hria. Sum thawh chhuah nei tlem na nâ nâ chuan sum a indaih loh avangin sum pûk a mamawh ṭhin a, a pûk ṭhin rêng bawk a ni.

Mizoram sorkarin sum pûk a mamawh ṭhin tih te, sum a pûk ṭhin tihte hi political party mite hian an hre tlangpuiin a rinawm. Chutih laia sorkar lai beihna atan an hmang fo hi chu ram leh mipui tana thil ṭha zawk duh vang ni lo, sorkar hmalakna leh thil tihte sawisel tum hrim hrimna a ang. Sorkar a kal fimkhur theih nan te, ram tana ṭha zawk tur duhna avanga insawisel te, thil ṭha zawk inkawhhmuhte hi chu a ṭha reng mai.

Sum pûk ngai loin Mizoram sorkar hi awm thei se duhthusam a ni a, mahse, pûk loin a kal hlei thei rih si lo. Tunah pawh sum pûk leh a tum mek a ni. Sum a pûk leh a nih pawhin, a pawimawh zawk chu sum pûk chu ram leh mipui hmasawnna atan hman ṭangkai a ni em, tih hi a ni.

Sorkar insawisel ngawr ngawr tum aiin, sorkarin sum a hman dan a dik leh dik loh te, a ṭhat leh ṭhat loh lamahte political party mite pawh harhvâng lehzual se a ṭha àwm e.