Khuarèl chhiatna thlenga tawrhna

Mizoramah ruah a sûr nasat avangin nimin May 28-ah Mizoram hmun hrang hrangah chhiatna a thleng a, mi 30 chuang an thih phah a, a pawi tak zet a, chhiatna tuartute leh mitthi an lainatawm em em. Mizoram chanchinah khuarèl chhiatna thlenga ni khata mitthi an tam ber ṭum a ni hial àwm e.

Khuarèl chhiatna thleng hi Mizoram mipuiin an ngaihven a, a theih ang angin chhanchhuah hna thawh a ni. Chief Minister hoa ram hruaitu eng emaw zatin chhiatna thlenna hmun an pan nghal leh, chhiatna thlenna hmuna mite bakah hmun hrang hrang aṭanga chhanchhuah hna thawk tura thawk chhuakte an fakawm.

Chief Minister-in chhiatna thlenga chhawmdawlna leh ṭanpuina atana hman turin cheng nuai 1,500 dah nghal a nih thu a puang leh sorkarin mitthite a ràlna a hlan nghal hi a lawmawm a, chhiatna tuartute tan mai bakah, Mizoram mipui tan a thlamuanthlak.

Chhawmdawlna atana sum dah hi a tam tham a, dik tak leh ṭha taka hman ni se, chhawmdawlna dawng àwm takte'n a àwm tâwka an dawn ṭheuh theih nan bawhzui ngei ni se. A ṭul angin sorkar hotute pawhin an en zuia an vil zui zel a ṭul ang.

Khuarèl chhiatna thleng hi politics-a hamṭhatna lâk tumna atan emaw, tute emaw demna atan emaw hman tum lo tlang ila. Politics-a hamṭhatna lâk tumna rawngkai ṭawngkam leh thil tih a awm hian mipui tan hmuh leh hriat a nuam lo ṭhin.

Fûr a thleng chho mek a, fûr lai hi leimin tam hun lai, chhiatna thlen tam hun lai a nih ṭhin avangin mi tin kan fimkhur a ṭul. Khuarèl chhiatna hi dan theih ni vek lo mah se, fimkhurna hmangin tawrhna tihnêp theih leh a ṭhenah phei chuan vèn theihte pawh a ni. Sorkar leh mipui kan fimkhur lehzual a, chhiatna a thlen zel loh nan mahni theihna zawn ṭheuhah ṭan lak sauh sauh a ṭul.