Fûr laia tui harsatna

Tun kar tìr lamah ruahsur nasa avangin Mizoram hmun hrang hrangah chhiatna a thleng a, Tlawng lui pawh nasa takin a lian a, Aizawl châwmna atana tui lakna hmunte a chîm thlen hial avangin tui pump chhuahna khawlte hman theih a ni rih lo. PHE department chuan tui pump a pangngai theih rih loh avangin tui ren tur leh ruahtui khâwl turin mipui an ngen.

Tlawng lian hian GAWSS Phase I-a tui pump-na khawl a tichhe ngeiin niin a lang a, chuvang chuan PHE lam chuan hun eng emaw chen tui pump an thei dawn rih loah an ngai. GAWSS Phase-II pawh power supply-ah harsatna a awm ṭhin avangin tui pump a mumal thei dawn lo tih an sawi bawk.

Fûr lai, ruahtui tlâk tam hun leh luite pawh a len hun lai ni chho mek mah se, tui pump theih a nih rih loh avangin Aizawl mipuiin tuiah harsatna an tâwk thei dawnin a lang a. Chuvang chuan PHE department hotute'n harsatna a thlen nasat lutuk lohna tura ngenna an siam - tui ren leh ruahtui khawl hi chhungkuate'n an zawm a ṭha viau.

PHE department-in harsatna an tawh hi khuarel thil vanga thleng a ni a, indemna chi a ni kher lo ang. Mipuiin sorkar emaw, PHE department-a thawkte emaw dem nan hmang mai loin, an hriatthiam a ṭul ang. Puih theihna remchang a awm a nih phei chuan inpuih hial chi zawk a ni àwm e.

Ni hnih/khat lek pawh tui pump chhuah theih loh a nihin Aizawla tui sem danah harsatna a thleng nghal ṭhin a, chhungkaw tam takin tui an dawng ṭha lo nghal mai ṭhin. Ni eng emaw zat tui pump theih loh a niha mipui tawrh theih dan chu PHE mi leh sate'n an hre chiang hle ang.

Hun eng emaw chen tui pump theih a nih loh chuan mipuiin harsatna nasa tak an tâwk ngei dawnin a lang a. Chuvangin, mipuiin harsatna an tawh dan tur hre ràn chungin PHE department-a thawkte pawhin harsatna chin fel thuai a nih theih nan ṭan an la tur a ni. PHE department hian inthlahdah lo leh ṭang mar pátin tuia harsatna an chinfel thuai mipuiin an beisei dawn a ni.