Chhiah leh neitu nihna

Chief minister Lal Thanhawla chuan, "Mizote pawh hian chhiah chawi tam ila, sorkarah neitu leh mawhphurtu nihna rilru kan pu thei zawkin ka ring. Sorkara thawh neih ve aia sorkar aṭanga hmuh ringawt kan tum ṭhin hi sim a hun tawh hle a ni," a ti.

Chhiah kan chawi tlem avangin Mizote'n sorkarah neitu nihna thinlung kan pu lo a, sorkar chu mihrang enin kan en a, sorkar chu a rawka rawk hial pawh kan hnial lo niin an sawi ṭhin. Chhiah kan chawi tam loh avanga sokar kan intitatu lo nia sawi hi dik thui viau mah se, chhiah pek tam ringawt hi neitu nia inhriatna niin a lang lo.

Kan chhiah pek khawmte an hman dan hriat a, a ṭangkai dante leh vantlang tana ṭhaa hman a nih dan hi langtlang leh chiang taka hriat theih ni se, mipuite hian chhiah pek hi an hreh lo sawtin a rinawm. Chhiah pek tam hrim him lam aiin chhiah pek dan kalphung fel leh a hman zui dan kalphung dik hi a pawimawh a, hemi kawngah hian inzir tur a la tam hle.

Mizoram chang a ni lo, India ram state dangte pawh hi chhiah lak leh a hman zui danah hian a la ṭha tawk lo a, ram changkangte nen chuan a la inthlau hle. Chutihlaiin India ram state-ah pawh chhiah awlna leh a hniam berna pawla cheng kan ni a, sorkara neitu nihna kan pu lo pawh hi hei nen hian thui tak chu a inkaihhnawih thei ngei ang.

Chhiah pek hi Mizo mipuite hian an hreh ngawr ngawr a ni lo a, sorkar kalphung enin chhiah pek hi an phur lo a ni thei. Chhiah hi tun aiin a letin pe tam mah ila, kan sorkar sum chet vel dan hi tun ang tho a nih chuan mipuite hian sorkar hi an intitatu sawt kherin a rinawm lo. Chhiah chungchanga thil pawimawh chu inzirtirna ṭha tak neih hmasak a, mipui tana awlsam taka pek theih dan kawng siam a, a hmanna kawnga langtlang leh fel taka ruahmanna siam hi a ni awm e.