Ramria Assam chet dan

Tun hnaiah Cachar DC hoin Assam Forest department leh Police-te'n Thinghlun, Mamit district-a Mizo thlám an hâl a, a kuhva kûng tam tham tak an tichhe bawk. Huan neitute hian Mizoram sorkar aṭangin an huan atan hian periodic patta an nei.

Thinghluna Mizo thlam tichhe tur hian Assam sorkar lam hian ruahmanna fel tak an nei sa tih a hriat a, sorkar official hrang hrang an kal bakah police lam silai kengin an kal bawk a, thlam leh a chhunga kuhva kungte an suasam hnuah thlam hi an hal zui ta niin a lang.

Assam sorkarin Mizoram chhunga kut a rawn thlak mai pawh ni lo, Mizo pa huan nasa taka an suasam ngam leh press mite hruaia an chetla lai thla an la a, thiam chan tuma an thehdarh zui hian Mizoram leh Mizote min tham lo hle tih a entir a ni. Assam police-te haw hnuah Mizoram sorkar pawhin sipai tirin thlam awmna hmunah hian awm hmun an khuar zui a, hei hi thil lawmawm tak a ni a, chutih rualin Assam lam chuan an tih duh chu an ti zo hman thawkhat tawh a ni. 

Assam mite hian tun hnaiah Vairengte leh Lailapur inkara Mizoram leh Assam inrìna báwr vel, ramri buai vanga a tu lam mah mahin kutthlak lo tura tih laiah in leh dawr eng emaw zat an sa thar a, an luah ṭan mek a; in/dawr an sak thar zinga Vairengte hnaih ber chu kum 2007-a MZP-in Zo Rún an sakna chhak daih, auto-rickshaw stand thlang lawkah a ni.

Thinghluna Mizo pa thlam suasamtute hi tlangval hawllak leh misual ni loin Assam sorkar mi leh sate an ni a, hetihlai hian kan ram luhna ber Vairengte lamah pawh min rawn nawr leh mek niin a lang. Zirlai pawl leh pawl dangte'n an theihna zawnah hma la ve ṭhin bawk mah se, ramri buai chinfel hi chu sorkar kut a ni a, politics-a inbeihna ang leka ngaih tur a ni lo. Kan chief minister ngeiin ramri chinfel dan a hriat kha tun hi a hman hun a ni ngei ang.