Inzir nan hmang se

Commercial Vehicles Joint Action Committee (CVJAC) chuan an thil phût nawr nana May 18, 2016 aṭanga tiam chin awm loa nawrh an huaihawt avanga sumdawng lirtheite ni li chhung an tlân loh hnuah May 21, 2016 tlai khan nawrh an titawp lailâwk.

Sumdawng lirthei nuar hian titi a titam hle mai a, CVJAC duty ṭhenkhatin private lirtheia tlawmngaia mi dangte an phur tur an lo dang tihte a awm a, duty
ṭhenkhatte Aizawl bazarah tlaivara duty an awm tih thawmte a lo ri bawk. Heng duty-te hian an eizawnna atan ṭhahnem an ngaih vangin heng hi an ti a nih rualin, mipui tam zawkin an thlawp loh phah niin a lang.

Mizoramah hian pawl a tam hle mai a, lungawi lohna lantir chang pawh a awm ve ṭhin. Lungawi lohna lantir dan chi hrang hrang a awm a, chung zingah chuan mipui nawlpui nghawng ngeia lungawi lohna lantir hian a nghawng a na a, sorkar ngeng pawh a chhun viau niin a lang. Total bandh hialte pawh huaihawt ṭhin a nih vangin tun hnaia CVJAC-in nawrh an huaihawt hi chuan mipui a la tibuai tam lo zawk hle a ni.

Heti chung hian mipui tihbuai tum hrim hrim niawm taka chet hi a awm thei a, hei hi lungawi lohna lantirtu lama an hotute rel pawh ni lo, a duty ṭhenkhatte tih a ni duh khawp. Strike, bandh, kawngzawh leh lungawi lo punkhawm ang chi-ah hi chuan duty ṭhenkhatte chet uchuak vang leh chet mawi loh avangin a pawl pum a mualpho phah theih a, hei hi inven sen pawh a harsa ṭhin hle a ni.

Tun hnaia sum-dawng lirtheite nawrh chungchanga thil thleng hi inzirna atan hmang ila, tute pawhin nawr leh lungawi lohna an lantirin mipui tana hnawksak loa tih theih hram tum a ṭha. Democracy rama cheng kan ni a, kan ngaihdan puanchhuaha kan lungawi lohna lantir chang a awm ṭhin ngei ang. Heng hunah hian mipui hi dah pawimawh hmasa ṭhin ila, mirethei leh harsa zawkte tana harsatna siam belhchhah zawngin i khawsa tawh lo ang u.