Mizo nun mawi a lang chhuak

Tun hnaiah Mizoramah chhiatna hrang hrang a thleng a, a lungchhiatthlak tak zet rualin, lawmna tur a awm ve bawk a, chu chu - tlawmngaihna a taka a lang chhuak hi a ni.

Leiminin hmun eng emaw zatah in hnâwlin, mitthi pawh 30 chuang an awm a, chutah chuan Mizo nula tlangvalte'n tlawmngaihna an lantir a, hmun hlauhawm tak karah chhanchhuah hna an thawk.

Chhimphei tlangdunga khaw hrang hrangte chuan kawngpui ber hmun tam takah a pin avangin lirthei a kal thei lo a; chirh leh diak, kawng nâl tak leh a cháng chuan kawng pangngai pawh ni loah damlo leh mitthi ruang niléng zankhuain hlângin an zâwn a! Chhiatna thlenna hmun tam ber hi Chhimphei tlangdung, Aizawl South-III huam chhung a ni a, an hah zual hle ngei ang.

Chhiatna kara Mizo tlawmngaihna a rawn pár chhuak hi a thlamuanthlak a, Mizo nih tinuamtute an ni. Mi tlawmngaite che vel hmuh a nuam a, an thâwm hriat a nuam a; lawm avangin mi tam tak an lungchhe hial. Phût lêt nei hauh loa mite ṭanpui tura che chhuak a, chhanchhuah hna thawktute zawng zawng hian fak an phû a ni.

Hetih lai hian, mi tam tak an buai lai leh hah taka mite tana an thawh lai leh, ramin harsatna a tawh laia chêt chhuah tum lo, mahni in aṭanga phone hûma mi dang sawisel tur leh mawhchhiat tur lo hre em em pawh an awm mai thei. Chu'ng mite chuan Mizo hnam hi chhe ta em emah an chhuah fo mai thei bawk. Mi thatchhia leh zawmthaw, mi ṭha lo eng emaw zat awm tawh bawk mah se, Mizote hi hnam tlawmngai, ṭanpui ngaite ṭanpui ṭhin hnam kan ni tih hmuh hmaih theih a ni lo.

Tun hnaia Mizoramin chhiatna a tawh hi inngaihtuah tharna atan hmang ila, mahni inenfiah ila; kan tlin tâwk lohna ṭheuh kan inhmu theiin a rinawm. Hmasawn kan ngaihnaah hmasawn tum ṭheuh ila, Mizo nun mawi tak hi a vul zual zel theih nan ṭan ila thar zel ang u. Tute pawh hi mi dangte puih leh buaipui ngaia kan awm hun a la awm ngei dawn si a.