Ram tihkan

Kangmei ven hapta hawnaaa thusawitu Home minister chuan, kângmei chhuak tur ven a pawimawhzia leh ramngaw humhalh a pawimawhzia chu Mizo mipuiin hre viau tawh mah se, inzirtir nawn reng a ṭul thu a sawi a, "Mei hi thunun a nih loh chuan kângmeiah a chang ṭhin a, mihring mai bakah nungcha leh thlai, ramngaw, sik leh sá thlengin nasa takin kan tawrh phahin chhiatna rapthlak tak a thleng ṭhin a ni," a ti. 

Kum tinin kangmei ven hapta hi hman ṭhin a ni a, kan ram hruaituten he mi lam hawi thu ṭha tak tak an sawi tawh ṭhin a, chuti chung chuan mi inthlahdahte avangin kan ramah kum tin mai buaipuiawm tham kangmei a chhuak ṭhin. Heng kangmei ven haptaa ram hruaitute'n thu an sawi hi kan ngaihtuah zui mang lo a, kan ngaihsak vak lo a, kan kalphung hi a inthlak mawh khawp mai. 

Mizorama kangmei chhuak ṭhin, a bîk takin ram lama kangmei chhuak ven dan ṭha tak chu ram tikangtute chunga hremna lek kawh hi a nih hmel. 

Tunah hi chuan tute emaw fimkhur loh vanga kangmei a chhuah hian a khaw pumin kan tuar a, fimkhur leh taima taka meilam sialtute pawhin an tuar ve tho a, a tikangtute hrem an ni ngai vak lo. Ram tihkan hi thil hlauhawm a ni lo a, kangmei tihchhuah hi pawi lian tham khawiah kan la ngai vak lo a ang ber. 

Home minister sawi ang hian kangmei chhuak hi mihring chang ni loin nungcha dangte thlengin an tuar a, Mizoram kan tihkan nasat avanga kan sik leh sâ thlenga inthlak danglam chho mêk pawh kan tawng ta. Tun ang zela kan kala kum tin mai ram kan tikang duai duai a nih chuan kan ram hmabak hi a eng vak lo a; loh theih loha lo kan neih avanga lo kan hal pawh a uiawm tawh a, hemi piah lama ram kan tikang tel ṭhin hi chu a pawizia kan la hre dâwn chauh a ni.