Zirtirtu post ruak hnawh khah

School Education department chuan tun dinhmunah sorkar sikulah zirtirtu nghet sanctioned post 7,224 a awm laiin, a zatve aia tam hret post 3,682 (50.97%) chiah hnawh khah a ni a, post ruak 3,542 (49.03%) a awm tih a tarlang. Sorkar sikulah headmaster indaih lohna 583 a awm a, chu'ngte chu P/S-ah 349, M/S-ah 202 leh H/S-ah 32 a nih thu tarlan a ni bawk.

Mizoram sorkar sikula zirtirtu post ruak a tam em em mai hi zirna leh zirlaite'n engtin emaw tak an tuarin a rinawm a, Mizoram hma lam hunah a ṭha lo zawngin a nghawng theiin a rinawm.

Tunlaiah mithiam tak tak an tam tawh a, sorkar hnain a daih vek lo. Zirna lama thleng sang tak takte pawhin hlawh tam lo tak neiha zirtirtu hna a nghet loa thawh an hreh lo a, a nghet loa thawk pawh tam tak an awm reng. Zirtirtu pension-a chhuak an awm reng a, mahse, chung mite hmun ruak hnawh khat zo khawp hun rei tak kal ta aṭangin lak a ni tawh lo. Mizoram zirna hi zirtirtu, a nghet loa thawkte leh central scheme hnuaia thawkte kutah thui tak a innghat a ni.

Tunlai mite aiin hun hmasa lama lut zirtirtu kha thiamna lamah an hnial zawk tlangpui a. Zirtirtu ṭheuh ṭheuh, sikul ang khata thawk ni bawk si, thiamna/qualification lama mahni aia hniam zawkte aia hlawh tlem zawk fé an hlawh ṭhin hian an rilruah nghawng a nei ṭhinin a rinawm. Hnaa inpek tâwk lohna a thlen thei a, hna dang ṭha zawk an melh reng phah thei a; chu'ngte chuan nghawng thui tak a nei thei.

Zirtirtu indaih lohnate central scheme aṭang leh contract leh muster roll ringawta phuhrûk hi kan ram leh hnam kal zel turah a ṭha lo theiin a rinawm. Zirtirtu nghet indaih lohna hi tun maiah hnawh khah theih a ni kher lo ang a, chuti chung chuan a tahtawla hnawh khat turin tun aṭanga inbuatsaih chhoh a ṭha ang.

Hnaah hian tuina, lungawina, himna leh thlamuannate a awm loh chuan a thawktu tan taksa leh rilruah harsatna a awm thei. Hengte hi hna thawh theih hun chhung zawnga thawh turah phei chuan a pawimawh tak zet a ni.

Mizoram zirna hi a nghet loa thawkteah nghat reng loin, hma lam hun thui tak thlir chung leh Mizoram zirna a ṭhat zawkna atan zirtirtu post ruak hnawh khat turin sorkar a inbuatsaih chhoh zel a ngai e.