MP inthlan vote chhiar a ni dawn ta

Parliament-a rorelna in pakhat zawk, Lok Sabha member tur thlanna, kumin April 19 aṭanga June 1 thlenga neiha vote tlate chu vawiin hian chhiar a ni dawn ta a, vawiin tlai lamah emaw, zaninah emaw chuan result hriat kim theih a beiseiawm.

Lok Sabha inthlanpuiah hian Mizoramah chuan April 19-ah vote thlâk a ni a, boruak muanawm tak hnuaiah vote thlâk a ni. Mizoramah vote a tla ṭha tâwk lo a, kan tlin tâwk, Mizoram mipui rilrua a thawh dan mila vote tla a ni tih kan hriat thiam a ngai a; vote tla ṭha lo hi candidate tu emaw tlin phahna leh tlâk phahna chhuanlama hman chi a ni lo ang.

Inthlan a ni miau a, Mizoramah chuan mi pakhat bak thlan tlin theih a ni lo miau a, tling leh tling lo an awm ngei dawn. Tling zo ta lote'n chhuanlam eng eng emaw an neiin a rinawm. Chhuanlamte chu eng pawh ni se, Mizoram mipuiin an chunga kut an thlâkna a ni tih candidate leh party-te'n pawm thiam a ṭul. Tling zo lote'n tlin loh dan an thiam a ngai a, tu pawh tling se, inlawmpui thiam se; a Mizo zia em em dawn a, Pathian ringtu zia hle dawn a ni.

Thlan tlin leh a awmna party mite pawhin tlin dan an thiam a ngai. Chapo lo turin fimkhur se, inphah hniam zawk thei se a mawi ngawt ang. Candidate thlan tlin leh a awmna party chu mipuiin an ring a, an duhsak rih a ni mai a, chapona leh mi dang hnuaichhiah nan an hmang a nih vaih chuan, nakin lawkah mipui bawkin an hnâwl leh mai thei dawn a ni.

Tu pawh tling se, inthlan hma, vote an zawn laia mipui hnena an sawi leh intiam ang taka hma an laka hna an thawh hi a pawimawh ber chu a ni; hei hi an hriat reng a ngai.