Damdawi hman sual vanga thihna

May 13, 2016 thleng khan damdawi hman sual vangin kum 2016 chhungin mi 28 an thi tawh niin Excise & Narcotics department chuan an chhinchhiah a, heng zinga mi panga hi hmeichhia an ni. Kum 2015-ah damdawi hman sual vanga thi mi 27 an awm nia chhinchhiah a ni bawk a; kum 1984 aṭanga kum 2016, May inkarah Mizoram mi 1,370-in damdawi hman sual an thihpui tawh nia chhinchhiah a ni.

Kumin chhunga ruihhlo avanga thihna thleng hi a tam hle a, tun ang zela a kal chuan a pawi dawn hle a ni. Tun hnaiah khaw chhak aṭanga ruihhlo lo lut ṭhin heroine No. 4 hi a hluar hle niin an sawi a, tun hma aia a mana tlawm piah lamah lei mai theih tur a tam hle niin an sawi. Central YMA lama ruihhlo dotu pawlte hriat danin Zokhawthar aṭanga maxi cab lo chhuk thla zinga a tam zawkah hian ruihhlo tawlhtu hi an awm deuh zel niin an sawi.

Hei bakah hian damdawi pangngai, Mizo ṭhalaite'n an hman sual avanga ruihna hlo lo chang zo ta a awm bawk a, heng damdawite pawh hi kan
ṭhalaite'n an thihpui mek bawk. Damdawi pangngai hman sual hi chu a lo luh danah inven a harsa a, damdawi dawr pangngai aṭanga lei theih chinah hi chuan inkhap vek hi thil harsa tak a ni a; hemi piah lamah hian ruihna atana an hman nasat bik damdawite chu damdawi dawr pawn lamah pawh an zuar ru tel bawk.

Tuna kan ram din-hmunah hi chuan a damdawi leh ruih-hlo lam tihrem tum zawnga beih hi a hautak viau a, a hautak tawlh tawlh dawn pawh a nih hmel. A pawimawh chu ruihhlo ti lo tura infuih a ni a, hemi kawngah hian chhungkaw tam tak tlai tawhah inngai mah se, ruihhloin a la tihbuai loh chhungkaw tam zawkah tun aia uara inzirtir ni se. Sikul leh Biak In lam thlengin tun aia uar zawka ruihhlo ti lo tura zirtirna pek a ṭul tih kan dinhmun tawn mekah a lang.

Damdawi hman sual avanga tihna a tlem theihna turin ruihhlo dotu pawl leh hnathawktute tihchak an ṭul a, chumi rual chiah chuan ruihhlo ti lo tura inzirtirna hi tun aia nasa zawka kalpui ni rawh se.