Inner Line Permit

Tun hnai khan Serchhip sub-headquarters YMA leh Police-te ṭangkawp chuan Serchhip leh a chhehvela hnam dang awmte Inner Line Permit neihte an endik a, ILP nei lo, hmang dik lo leh ILP thi tawh mi 50 an hmu chhuak.

Mizoramah ILP hman a ni a, ILP tel loin state pawna hnam dangte tan Mizoram chhunga luh leh hnathawh phal a ni lo. ILP nei tur hian hnam dangin anmahni maiin tih theih an nei lo a, Mizoram chhunga mite'n an sponsor a ngai a, Mizorama hnam dang ILP neite hi Mizorama miin an sponsor vek an ni.

ILP hi a lem a awm niin an sawi ṭhin a, hmun ṭhenkhat aṭangin awlsam taka lei chhuah theih nia sawi a awm bawk. Hetihlai hian ILP lem leh ILP hralh hi man chhuah tak erawh an awm lo a ni mai thei a; nimahsela Mizoramah hian dan dik tak anga ILP pek chhuah pawh hi a tam tham hle a ni.

Hnam dang hnena ILP pek an nih dawn hian a sponsor-tuin a hnathawh turte fel takin an tihsak ṭhin a, chutianga an thawk zui lo a nih chuan hnam dang mi man mai hi a tawk lo a, a sponsor-tu lam pawh hriattir a ṭha khawp mai. Hnam dangte ILP siamsak zung zung a, an khawsak zui dan ngaihsak leh loh phei chu thil fel lo tak a ni a, hnam tana thil pawi tak thlentirtu an ni thei tih an inhriat a ṭha khawp mai.

Serchhip lama ILP endik a ni ang hian Mizoram hmun hrang hrangah ILP hi endik a ṭha hle mai a, police lam an indaih lo deuh a nih pawhin police-te kaihhruaina hnuaiah tlawmngai pawlte pawh an thawk chhuak thei zel a; dan anga ILP endik theite'n phungbawmah midangte sawmin Mizoram puma hnam dangte ILP neih hi endik ni se, ILP hman dik loh tam lutuk hi ngaimawh a hun takzet a ni.