Fur atan kan inpeih em?

May thlaah ruah tui a tlak tam avangin Mizoram hmun hrang hrangah lei min a tam hle a, kawngpui pawimawhte a chhilh a, vanduaina tawka nunna chan hialte pawh an awm.

Kuminah fur pui kan la hma-chhawn dawn chauh a ni a, May aṭanga kan buai dan en hian Mizoram hi fur hmachhawn tur hian a inbuatsaih a ngai hle tih a lang. Kum tin mai ruah tui tlaklai hian harsatna kan tawk ṭhin a, kuminah phei chuan May thla aṭangin a ram pum buaiin kan buai a ni ber.

Fur ruah tui a tam kumah phei chuan harsatna lian tak tak a thleng ṭhin a, heng harsatna thleng ṭhinte hi pumpelha inven lawk vek theih ni hauh lo mah se, a hlauhawm thei tur hmunte hi chu a inven theih dan dan a awm a, fimkhur tlan ni se a ṭha khawp mai.

Kan in leh a chhehvela tui luanna ṭhegh ngun takin endik vek ila, tuidawn aṭanga tui paih kalna pawh uluk takin en nawn leh ṭheuh ila, mihring chenna hnaivaiah lei min hlauhawm bik a awm chuan a theih ang angin khuh ila, harsatna thleng thei
ṭhenkhat chu ven theih a nih a beiseiawm.

Kan thlanmualte hi lei rem sa inhnai tak taka laih khuar a nih vangin thlan chhunga tui a luh chuan a min duh bik dawn a, chuvangin thlan chhunga tui a luh lohna turin thlan vur uluk ni se, thlan siam loh pawh ni se a chhunga tui a luh loh dan siam a finthlak ang. Hei bakah hian khawtlangin hna-tlangin thlanmuala tuihawk luanna ṭha zawk siam a, tui luanna ṭhinte en chian a, fur ruahtui tlak tam hmaa inven a ṭha khawp mai.

Fur a lo thlen hian harsatna a thlen tel fo ṭhin a, heng harsatna tam tak hi chu inven ngaihna awm hauh lo ni mah se, chhiatna thleng kan tih ṭhenkhatte hi mihring siam chawpte a ni ve ṭhin a, theihtawp chhuaha inven lawk a ṭha hle mai.