Mizoram MP laka mipui beisei

Parliament (Lok Sabha)-a Mizoram aiawha ding turin ZPM candidate thlan tlin a ni ta a, tling zo ta lo political party hrang hrangin an lawmpui thu leh duhsakna an hlan thu press release hmangin an tarlang a, a mawi hle mai.

MP atana thlan tlin tâk lakah hian Mizoram mipuiin beisei an nei sang hle dawn a, chuvang chuan a ṭan hle a ngai dawn. Mizoramah rorel lai party an lo ni bawk nen, an lakah mipui beiseina a sang lehzual niin a lang.

Inthlan hma, campaign laiin candidate hrang hrangin MP an nih huna an tih turte mipui hmaah sawiin an inzuar a; MP atana thlan tlin tâk pawhin MP a nih anga a tih tur chi hrang hrang a lo sawi tawh. Mizoram sorkar tan leilâwn rinawm tak ni turin a inpek thu te, a theihna leh chaknate ram tan nasa zawka a hman tur thu te, MP fund mai bakah central scheme leh project-te Mizoram tan a tam thei ang ber hai chhuah a tum thute a lo sawi tawh.

MP thar hian inthlan hmaa a sawite a taka a bawhzui a, Mizoram tan theihtawp a chhuah ngei mipuiin an beisei dawn. Ram leh hnam tan hmasawnna eng emaw tal a thlenpui beiseiin an lo thlir rân dawn a ni tih hria a, a theihna leh chakna zawng zawng nen ṭan a lâk a ṭul ang.

Lok Sabha MP thar hian Mizoram mipui thlàwpna leh ṭawiawmna a mamawh hun a la awm ṭhinin a rinawm; chu'ng hunah chuan mipui pawhin hnungchhawn loa an thlàwp a ngai dawn a ni.

Political party dangte pawhin ram leh hnam tana ṭha turah chuan Mizoram MP-te hi an party mi an ni emaw, ni lo emaw, an thawhpui thiam a ṭha; insawisel ringawt hi chu mipuiin an hnê a, thil ṭha a thlen kher lo bawk. Chutih rualin, ram mipui beisei an pha lo a, an thawk ṭha lo a nih chuan, thil ṭha zawk duhna avangin insawisel a ṭha zawk thei bawk.