Aizawlah flyover

Chief minister chuan tun hnai khan Aizawl khawpuia Bawngkawn leh Vaivakawna flyover bridge siam tur chu a en a, flyover siam tura rawih Telecommunications Consultants India-te rua­hmanna siam chu CM hoin Engineer-ten an en a ni. 

Khawpuiah lirthei a pung zel a, kawngpuiin a zo lo a, traffic jam avangin hun tam tak khawhral a ngai ṭhin. Aizawl khawpui kawng pawimawh pahniha lirthei tlan theihna tur lei (flyover) dawh a nih chuan traffic jam tam tak hi chu a ziaawm phah ngei a rinawm a, a ṭang thei angin hna thawk thei se a duhawm hle. 

Chief minister hian kum 2018 inthlan hma aṭang tawh khan Aizawla traffic jam hi a vei em em a, traffic jam awm lohna khawpui siam hial a tum a ni. Hei mai hi ni loin kawng chhawng siam pawh a theih a ring a, a ring mai ni loin a siam dan turte pawh TV interview lamah a sawi chhuak nghe nghe a ni. Tunah hian a sawi ṭhin kawng chhawng bul ṭan tumna lam la sawi ri lo mah se, kawng peng ṭhuam tamna leh kawn pawimawh leh lûn laia flyover siam tumna a awm hi thil lawmawm tak chu a ni phawt mai. 

India ram khawpui dangah hi chuan flyover-te hi chu hmun pawimawh deuha traffic tithawl turin an dah fer fur hlawm tawh a. Kan khawpuiah hian lirthei kal theihna tur flyover hi chu kan la nei meuh lo a, chuvang pawh chu a ni ang, siam ṭan a nih hma hauhin engineer-te mai pawh ni loin state hotupa ber chief minister ho meuhin vawi hnih endik a ni ta. 

Tunah chuan Aizawla kawn lûnlaiah flyover siam tumna a awm tih a chiang ta a, hengte hi siam zawh a nih hunah heng hmuna traffic jam nasa ṭhinte pawh a ziaawm ngei a beiseiawm.