Mimal nun inkhersak chiam hi

Kum 2023 tawp lamah Mizoram Legislative Assembly inthlanpui a awm a, a hnu thla nga velah Lok Sabha inthlanpui a awm leh a, MP thlan result hriat a nih aṭanga ni 20-na velah AMC by-election neih leh nghal a ni dawn. Political party hrang hrangte an buai hle mai a, rilru pawh an sêng nasa hle ngei ang.

AMC by-election neih tur hi bial/ward pakhat chauh a ni a, a huam chin pawh a zîm a, state pum huapa ngaihven leh buaipui chiam tur àwm pawhin a lang lo. Mahse, mal khalh a nih dawn avangin mipuiin an ngaihven rawn leh ngeiin a rinawm a, political party-te pawh an ṭang leh hlein a rinawm.

By-election neih turah hian political party lian pathumte chuan an candidate turte an puang tawh a, mi ṭha tak tak vek an niin a hriat a, corporator atan pawha awhawm tak tak an ni hlawm.

Chutih laiin, political party mi leh sate zinga mi tam tak hi chuan an duh chhe mah mah nia ngaih theihin, mi ṭha pangngai tak pawh an ṭhat lohna lai an zawng char char a, mualpho thei ang bera chhuah an duh ṭhin niin a lang. Hetiang zia hi a ṭha lo a, Mizoram politics kalphungah siamṭhat ngai laite zinga mi a ni.

Ram mipuiin MP tur kan thlang zo chauh a, kha inthlanah khan campaign hun laiin social media lamah chuan mi tu tute emaw chuan candidate tute emaw mimal nun kher a, sawichhiat lamah ṭhahnem an ngai hle. MP atana thlan tlin tâk ngei pawh hi mimal nun thlenga an sawichhiat nasat ber a ni hial mai thei; mahse, hneh taka thlan tlin a ni tho.

Mipui an fing tial tial a, mi nâwlpui hian candidate-te mimal nun, an hun kal tawha an nun dan sawi chhuah chiam te, insawichhiat ngat ngat maite hi an ning a, an hnê a, an vote turah nghawng an neihtir duh lem lo a ni mai thei. Hei hi political party mite inenfiahna tur darthlalang a ni.

AMC by-election neih turah pawh hian mimal nun kher vak te, dâwt leh thu dik tluantling lo hmanga intihmualpho tuma inbeih chiam ang chite hi chu kalsan tawh ila a duhawm hle. Tu pawh mai hi famkim lohna lai leh mi mithmuha tlin lohna lai nei kan ni vek si a.