Synod leh MLA inkawmnain rah ṭha chhuah se

Mizoram Synod hruaitute leh Mizoram Legislative Assembly member (MLA)-te chu June 5, 2024 khan Synod Office-ah an inkâwm a; Synod hruaitute'n Mizoram sorkar leh ram roreltutea an beisei thil chi hrang hrang an lo hrilh a, Chief Minister bakah minister/MLA ṭhenkhatin thu an sawi.

Synod hian tun hma aṭang tawhin Mizoram sorkar term thara MLA-te hun remchang hmasaah an lo kâwm tawh ṭhin. Hei hi mi ṭhenkhat chuan ṭul loah an ngaiin a rinawm a, an thlirna aṭang chuan a àwmna chin pawh a awm thei ang. Mahse, ram hruaitute hi ram leh hnam tana rawngbawlnaah kohhrante nen inpawh taka an kal a, a ṭulna apianga an intihchak tawn a ṭul a, an inkawm khawm ṭhin hi a ṭangkai hle ang.

Mihringte leh pawl hrang hrang, kohhran thlengin ṭhat famkim a harsa em em. Ṭhat tâwk lohna lai te, kal dan dik tâwk lo te, kal dan tur ṭha leh dik zawkte inpawh tláng taka sawiho hian rah ṭha a chhuah ṭhin. Chumi tur chuan inkawma thil sawiho ṭhin a ṭangkai em em a ni.

Mizoram tan kohhrante hi an pawimawh a, ram leh mipui tan tisa leh thlaraua hlâwkna tur thil tam tak an lo ti tawh a, an ti mek zel bawk a. Hun kal zel turah pawh an duh dan ang diak diakin ram rorelna a kal vek lo a nih pawhin, ram hruaitute ṭha taka an thawhpui zel a ṭha a, an ṭawngṭaipui fo a pawimawh bawk.

Ram hruaitute hnena Synod hruaitute'n an beisei thil hrang hrang an lo hrilhte hi a pawimawh hle. Hleih nei loa rorel tur te, eirûkna leh hlemhlêtna a bo theih nan ṭan la tur te, dan hmanga rorelna kalpui tur te, mipuiin ram leilung an insem rual theih nana ṭan la tur te, thutiama rinawm turtea an lo ngenna hi a pawimawh tak zet.

Synod-in an beisei leh an ngennate hi ram hruaitu MLA rualte'n theihnghilh zui nghal mai loin bawhzui se, tihlawhtling turin ṭan la ngei rawh se. Mizoram leh a chhunga cheng mipui tan hmasawnna nasa tak a thlen phahna tur thil a ni. A zavaia tihhlawhtlin nghal zung zung theih a ni kher lo ang a, chuti chung chuan tumna tak tak nena bawhzui a nih chuan eng emaw chen chu tihhlawhtlin theih a ni. Synod hruaitute leh MLA-te inkawm khawmna hian rah ṭha a chhuah ngei mipuiin an beisei e.