Ruang phurhna atana sorkar sum dah

Mizoram sorkar chuan sorkar sum kum (financial year) 2024-25 budget-ah mitthi ruang phurhna atan cheng nuai 500 a dah a, Mizoram chanchinah a vawi khatna niin a lang.

Ruang phurhna atana sorkarin cheng nuai 500 lai a dah hi thingtlang lam mi, khawsak harsa, hmun danga thite tan a lawmawm. MLA, a bikin thingtlang lam bialtute'n an ṭangkaipui lehzual ngei ang. Chutih rualin, ruang phurhna atana sorkar sum tam tham tak hman a ni dawn ta hi a uiawm tia ngaihtuah theih a ni bawk.

Hun eng emaw ti aṭangin MLA-te leh MLA nih tuma khawi bial emaw viltute'n an bial (bial vil) huam chhunga mi, khaw danga thi an awmin an khuaa ruang phurhna tur lirthei (lirthei hman man) an tumsak ṭhin a; hmun ṭhenkhatah phei chuan ruang phurhna man tumsak an inchuha sawi a ni.

MLA leh MLA nih tuma bial viltute'n ruang phurh man an tumsak ṭhin chu chîn ṭhanah an nei ta a, an tih loh chuan an dinhmun a chhiat phah theihah ngaiin an tih ngei turah an ngai chho a. Mipui pawhin phûtna rilru an nei zui a, bialtu MLA emawte tih ngei ngei turah an ngai zui ta zel a ni ber.

MLA-te tan an sum leh paia bial chhunga mite ruang phurh man tumsak zat zat zel a harsa a, an tan phurrit a tling. Sorkarin hrethiamin, MLA-te leh bial viltute'n phurrit an insiam chu sorkarin a tumsak dawn ta a; MLA-te'n phurrit an insiam chawp chu sorkar sumin a tuar ta a ni - a uiawm tham hle.

Ruang phurhna atana sorkar sum nuai 500 dah a ni hi mipui tan a lawmawm a, chutih rualin, a chhâwk zângkhai ber chu MLA-te leh bial viltute an ni. A chhan chu - ruang phurh nan sorkar sum dah a nih hma pawhin, mitthi zawng zawngah ni lo mah se, a tlangpuiin mitthi chhungte'n ruang phurh man an chawi ai MLA/bial viltute'n an peksak ṭhin tlat.

Eng pawh ni se, ruang phurhna senso tur sorkar budget-ah dah a ni tawh a, ṭangkai takin an hman beisei ila, fimkhur takin an kalpui turah ngai ila. Chutih rualin, MLA zingah hmang ṭangkai ve vak lo leh hlâwkpui bik riau an awm dawn a ni.