Document lem leh ha doctor lemchang

National Health Mission hnuaia ha doctor anga thawk hmeichhe pakhat chu ha doctor tak tak ni loin, document lem a hmang tih hriat chhuah a ni a, hriat chhuah a nih hnuah June 5, 2024 khan a hna aṭanga bànna a thehlut.

Hming bula 'Dr' dah thei chin hi chu mipui nâwlpui hian kan dah sang ṭhin. Mizoramah ha doctor lem chang, document lem hmanga sorkara thawk an awm thei hi mi mak tih a ni a, social media-ah phei chuan sawi zui a hlawh hle. Mi tam tak chuan Mizorama thil thleng thei àwmah an ngai lo hial niin a lang.

Mizoramah document lem hmanga sorkar hna thawk sawi tur an lo awm zauh zauh tawh a, a zialo hle. Tuna document lem hmanga sorkar hna thawk, báng leh ta phei hi chu ha doctor anga inchhâl, mihring taksa hriselna lam khawih thei a nih avangin a zialo tak zet a; sorkarin a ngaih thutak lehzual a ṭul.

Ha doctor lema chang hi sorkarin a se-záwl-chhuah tawp em, ni ta se nakin zel atan thil ṭha a ni lo thei. A hna aṭanga a bàn ringawt hi a tâwk em? Dan loa sorkar aṭanga hlawh a lo lâk tawhte chhuh lêt chi a ni em? A thil tih hi thubuai (criminal case) tling a nih a rinawm a, chutiang zawng chuan hmalak a ṭha lo'ng maw? Hmalak zui a nih loh chuan sual ngaihzamna lam rawng a kai thei. Sual ngaihzamna hian sual a tingampa a, a tipunlun ṭhin.

Document lem hmanga doctor anga hnathawk an awm thei hi sorkar official lam fimkhur tâwk loh vang a ni ve bawkin a rinawm. Hna a dilnaa document a thehluhte official-te'n an en chîk lo hle tih a lang. Uluk takin, chipchiar takin en se chuan, appointment an pek hmain document dik loa sawi hi an hmuh chhuah theih ngei a rinawm a ni.

Ha doctor anga inchhâla hna thawk zingah document lem hmang an awm tih sawi a nih aṭangin thuneitute'n hma an la a, Health Minister thlenga an bawhzui hi a lawmawm. Hun lo la kal zel turah inzirna atan leh fimkhur lehzual phah nan sorkar thuneitute leh official-te'n hmang ngei rawh se.