Aikal lâk - dinnaa din tlang ngam
June 6, 2024-a Council of Minister ṭhukhawm chuan sorkar thil pawimawh chi hrang hrang an rêl a, chu'ng zinga langsar tak pakhat chu Mizoram sorkar hnathawk zinga aikal lak tihtawp vekna tur, 'Actions Warranted Against Illegal Practice of Engagement of Proxies/Substitutes (Aikal) by Government Servants' pawm chungchang a ni.
Tun hma aṭang tawhin Mizoram sorkar hnathawk zingah aikal la tam tak an awm reng a, tun thlengin an la awm. Natna khirh takin a tlâkbuak vang te, chhungkaw dinhmunin a zir loh vangte a ni a, khawngaihthlak tak takte an ni. Ṭhenkhat chu khaw dang daiha thawh a ngaih vang te, hna dang (sumdawnna) thawh duh vanga aikal late an awm nawk bawk.
Aikal la zingah ngaihhnathiam tur chin, hriatthiam tur chin bithliah a har duh viauin a rinawm a, chhuanlam ṭha tak takte an ni hlawm a, chhuanlam pawm tlak loh hulhual ang chi chu an tam viau lo ang. Chuvangin, ngaihhnathiam bik awm loa vaihma mai hi tun hnai kum 3/4 vel lek ni lo, nakin zel atan thil ṭha zawk a nih a rinawm.
Ṭhenkhat chuan kum upa lam tawh, chak vak lote'n mithiam zawk leh chak ṭha zawk chhawra an aia kal tur an la hi an sawi mawi ṭhin. Mahse, aikal latu khan a thawh miah loh hlawh a la reng tihna a ni a, thil dik a ni lo.
Sorkar hnathawk, hna thawk peih tawh lote hlawh atana sorkarin sum a séng reng hi a tihtawp a ngai. Sorkar hnathawk chu a thâ a ṭhum tawh a, a thawk ṭha peih tawh lo a nih chuan voluntary pension-a chhuah theih a ni a, a chhuak mai tur a ni; sorkar pawhin inhawng taka remchang a siamsak a ṭul.
Aikal lâk tihtawp vekna tura Cabinet-in thutlukna a siam tâkah hian sorkar hi khauh takin a dinnaah a din tlang a ṭul. Sorkar hotute hi mi tam takin hrethiam turin an la ngen ngawih ngawih dawn, ṭhenkhat chu khawngaihthlak tak takte an ni ang. Sorkar neitute'n uluk taka an ngaihtuah hnua thutlukna an siam a ni a, thu zûk hni hnê lo turin mipuiin an beisei zui dawn a ni.