Subsidy dil chungchang

Mizoram sorkar hnuaia state level committee (SLC) chuan, M/s Mizo Carbon Product, Industrial Growth Centre, Luangmual tan sorkar laipuiah ṭanpuina cheng vbc. 3.4 a dilsak tawh. RTI Act zawhna Industries department-in an chhan danin Central Capital Investment Subsidies (CCIS) atan cheng nuai 93.90 leh raw material phurh ṭanpuina Central Transport Subsidy (CTS) atan cheng vbc. 2.47 dilna District Industries Centre, Aizawlah an thehlut. Dilna hi SLC chuan ngaihtuahin, an dil zat ang hian sorkar laipuiah an dilpui a ni.

Mizoramah hian subsidy hmanga sum siam an awm thu sawi ṭhin a ni a; thil a taka kalpui tak tak ni si lo, endik dawna rûn dâl maia din ve, CTS leh thil dang hmanga sum siamna atana hmang an awm ṭhin. Heng mite hian thil tak tak tiduhte kawng an hnawh ping thei a, a taka thil an kalpui si loh hmanga pawisa an la a nih chuan a fel lo hle a ni.

M/s Mizo Carbon Product hi a indin danah leh an kal danah rinhlelh a kai a, tunah hian thil an tihsual hriat la ni lo mah se, an bungraw phurh luh zat nia an sawi hian ngaih a tiṭha lo khawp mai. Ṭha taka kalin an tum ang takin hna thawk thei se, Mizoram tana thil ṭangkai a nih dawn phawt chuan hnam dang ta pawh ni se thil hnawksak tak a ni lem lo a; nimahsela a taka an thil tih hmuh theiha awm leh CTS an dil dan hi chu a inhmeh lo hle.

Engpawhnise M/s Mizo Carbon Product-te hian thil tum mumal neiin hna thawh an tum a, Mizoram sorkar kal tlangin sorkar laipui lamah hamṭhatna an dil ṭhin. Heng an hamṭhatnate hi an phû nia an hriat chuan Mizoram sorkar hian dilpui zel se, ram tana ṭha an thawk chhuak thei dawn a nih chuan sawisel chi pawh an ni lo ang. Thil hlauhawm tak erawh chu tun hmaa tute emaw anga sum siamna atana subsidy hmang a, a tawpa zuih ral zui leh ta mai an ni palh thei a; Mizoram sorkar pawh fimkhur se, subsidy an dilpui turte pawh zir chiang se, ram leh hnam tana ṭha turah chuan huaisen takin kal se, a nih lem loh chuan fimkhur rawh se.