Social media leh fake account

Hun eng emaw ti aṭanga social media-a account lâr tak David Sailo tih neitu/enkawltu nia hriat mi pakhat chu tun hnaiah police-in an man a, jail-ah a awm meka sawi a ni. Hei hian social media leh ṭhutkhawm titi luah viau.

Facebook-a David Sailo tih page-a thu leh hlate miin an chhiar nasa a, social media dangte hmang pawhin thehdarh chhawn a hlawh hle. A thu leh hlate chu mi tam takin ṭha an ti a, huaisen an ti a; mi lawm a hlawh viau. Mahse, thu ṭha tak tak karah thu dik tâwk lo pawh a awm ṭhina sawi a ni a, court-ah criminal complaint thehluh a ni ta hial rêng a.

He thubuai hi Mizoram police-te'n thâ thlah loin bawhzui zel se, thu dik leh thil nihna dik tak an chhui chhuah ngei mipuii an beisei a, an lakah mipuiin beiseina sang tak an nei. He thilah hian dikna dingchang ngei rawh se.

Tunlaiah fake account tih a lâr hle a, ṭhenkhat chuan second account tihte pawhin an sawi. A ṭhat leh ṭhat loh chu miin a hman danah a innghat viau ang. Fake account a ni emaw, ni lo emaw, miin a nihna thup emaw, thup lo emaw, a pawimawh zawk chu - social media account-te hi thil sual tihna, thu dik lo thehdarhna, mi tihmualphona leh pawi khawihna atana hman loh a ni.

Fake account pawh ni se, dan bawhchhiatna thil tih nan hman a nih loh chuan a pawina a awm hran lo. Fake account ni lo pawh ni se, thil sual tih nan leh dan bawhchhiat nan hman a nih chuan a ṭha lo.

Social media-a mi pawisawi leh thu dik lo thehdarh avangin mi eng emaw zat thubuai an neih phah tawh a, mi tam takin an mualpho phah tawh. Hengte hi inzir nan i hmang ang u. Social media hman thiam a ṭulzia miin an sawi tam tawh, zirtirna kan hmuh leh chhiarte hi zâwmtu nih i tum ang u.