Rel lo lutah inrin a ngai

Bairabi leh Silchar inkarah khualzin (passenger) phur rél lian a tlân ṭan ta a, prime minister Narendra Modi chuan video conferencing hmangin a vailiam. Rel hian zing dar 5:45-ah Bairabi a chhuahsan ang a, zing dar 9:15-ah Silchar a thlengin Silchar aṭangin tlai dar 4:45-ah chhuakin, zan dar 8:15-ah Bairabi a thleng
ṭhin ang.

Mizoramah khual-zin phur rel a lo lut ta hi thil lawm-awm tak a ni a, zin veivah kawngah thui takin Mizo mipuite'n an chhawr ngei ang. Rel hi a tlan chak a, a chuan man a tlawm bawk a, hei hi mipui nawlpui tan thil ṭha tak a ni.

Rel lo lut tur hian ken tel tam tak a nei dawn tih erawh hriat a ngai a, chumi atan chuan inbuatsaih lawk a ṭha hle. Rel hi khualzin phur tur a ni a, chumi zingah chuan hnam dang tam tak an tel dawn. Heng hnam dangte hi a ṭhen chu Mizorama luh phalna fel taka ILP nei an ni ang a, ILP nei lem lote pawh an chuang tel ve ngeiin a rinawm a, hei tak hi uluk zawka vil zui a
ṭul ngei ang.

Tuna a lan dan chuan Silchar aṭangin zan dar 8:00 velah Bairabi-ah khualzin phur rel a lo lut ṭhin dawn a, rel aṭanga lo chhukte hi enzui an nih loh chuan Mizoramah ILP nei lo hnam dangte tan awlsam takin Mizoramah a luh theih mai ang tih a hlauhawm a; rel lo luh tur leh a tlan hun turte hre chiangtu sorkar lam hian ruahmanna an siam ngei turah ngai ila, an siam lo a nih chuan a pawi thui thei hle dawn a ni.

Sairang thlenga rel luhtir tumin tunah hian chak takin hna kalpui mek a ni a, hei hian hmasawnna lian tham tak a keng tel ngei ang tih a rinawm. Hma-sawnna kan tih hian a chhe zawnga nghawng te pawh a neih tel ṭhin avangin a nghawng awm thei tur hi zir chian a, theih ang anga inven lawk hi hnam fing zawkte tihdan a ni a; Bairabi-a khualzin phur rel lian lo lutah leh Sairang thlenga rel kawng sial mekah hian police, tlawmngai pawlte leh kohhran thleng pawhin thiam taka lo dawngsawng tura inbuatsaih lawk a ṭul takzet a ni.