Eiruk do ngam?

Supply kudam aṭanga buhfai quintal 150 hralh rua puh, Kolasib DCSO hlui chu sorkarin a hna aṭangin a ban.

Mizorama thil thleng khat tak chu sorkar hnathawkte an hna aṭanga ban hi a ni a, sorkar officer pakhat chu buhfai a hralh ru ngei a ni tih fianfiah a nih avanga thubuai kal zelah a hna aṭanga ban a ni. He thil ang hi Mizoramah chuan a thleng ngai zen zen lo a, hei hian sorkar thil eiruk chingte eituk hlauhawmzia zirtir thei se a ṭha ngawt mai.

Kawng lehlama ngaihtuah erawh chuan DCSO hi a vanduai bik niin a ngaih theih a, a thiltih hi ṭha lo hle mah se ani aia sorkar thil eiru nasa zawk, man chhuah ve si loh tam tak an awm ngei ang. Kan officer 'fing' chin hi chuan man chhuah harsa takin thil an kalpui thiam a, sorkar sum leh theihna hmangin anmahni sum tur an siam a, an tihsualna lai leh an tisual lai tak hmuh tur a awm ṭhin si loh avangin man lohin an chhuak leh mai ṭhin.

Sorkar hi eirukna do ngam lo leh eirute pawh hre renga hrem ngam loa puh ṭhin a ni a, tuna buhfai hralh rutu ban a ni hial hian sorkar hi eiruk do kawngah a huaisen ta hle niin a lantir ang nge, sorkar nunrawng tak angin kan chhuah zawk ang? Mizote hi dan anga rorelna pawh hmachhawn ngam loa, thil tisualtu ngaidam duh zel mai kan ni a, "midangte pawh an ban chuang lo," tia sorkar rorelna lam dem lêt hlauh pawh an awm nawk ngei ang.

A pawimawh ber erawh chu sorkar hian eiruk hi a do duh a, a do ngam tak tak a nih chuan tuna mi hi a bul ṭanna ang lekah ngai rawh se. Mi fing ber tan lo pawha awlsam taka hmuh theih khawpa uchuak taka eiru sorkar officer tam takte hi chhui chiang ngam se, buhfai quintal 150 hralh hi banna tling a nih chuan Mizoram sorkara officer dang ban tawk thei tur tam tak an awm ngei ang.