Sikul an lut leh dawn ta

School Education minister hoa tun hnaia consultative committee ṭhukhawm chuan, board exam tur pawl 10 leh 12 zirlaite chu October 16, 2020 aṭangin regular class kaltir ṭan an rél a; nakkum March-a school academic session tawp tur chu April thleng pawhsei an rél bawk. 

Covid-19 avangin hun rei tak chhung chu zirna inte khar a ni a, tun hnaiah mahni remtihnaa class kal chhunzawm dan tur duan a ni. Hmun tam zawkah sikul hi chhunzawm la ni lo mah se, khawpuiah chuan sikul tam takin class an kalpui leh ṭan a, a bikin pawl 10 leh pawl 12 zirlaite tan zirna hi ngawrh taka kalpui tawhte pawh an awm a ni. 

Kan rama hri leng mek thlir chungin mithiamte'n sikul kal chu fimkhur taka chhunzawm leh theih tawhah an ngai a, ruahmanna hrang hrang pawh an siam tawh bawk. Hei vang hian hri lakah kan ram hi a fihlim ta tihna lam a ni lo a; nimahsela hri leng chung pawhin loh theih lohna avangin sikul chhunzawm hi a hun leh tawh an tih vang zawk a ni ang.

Zirlai leh zirtirtu lamin sorkar rua­hman­na siamte zawm ṭha se, sikul chhunzawm leh tur hi Covid-19 hri darhna a nih lohna turin fimkhur thiam tlang se; fimkhur avanga ina inkhung reng theih a ni lo a, loh theih lohna avanga zirna in hawn leh turah hian fimkhur thei ang bera kal hram ni se a lawmawm ang.