Thing phunte enkawl zui a ṭul

June 11, 2024-a Aizawla Green Mizoram Day hmannaa tarlan danin, kum 2009 aṭanga 2023, kum 15 chhungin Mizoramah thing ṭiak 17,56,160 phun a nih tawh bakah, phun tur thoin thing ṭiak 28,07,166 sem a ni tawh; thing ṭiak phun leh sem tawh chu 45,63,326 a tling.

Kum 15 chhunga Mizorama thing ṭiak phun leh mi dang hnena sem tawh zat hi a tam tham hle mai. Kumin Green Mizoram Day-ah pawh hmun hrang hrangah thing ṭiak tam tham tak phun belh leh a ni bawk.

Thing kan phun tawhte hi puitling vek se chuan kawngpui kam hmun tam zawkah hian thing a ding thelh sung tawhin a rinawm; mahse, chutiang chu a ni si lo.

Thing nuai 45 chuang phun tawhte zinga a tam ber chu a puitling lo a ni tih a chiang a, a chhan tam tak a awm thei ang. Thing phun a puitlin loh chhana mi tam takin an ngaih chu - enkawl zui loh vang, tih a ni. Thing ṭiak nuai 45 chuang atana sum sen a tam hle ngei bawk ang.

Thing kan phun tawh zat leh thing phun tam zawk a thih zui tawh dan ngaihtuahin, sorkar - EFCC department lam hian kal dan ngai reng ringawta kal loin, tih dan thar ṭha zawk tur an ngaihtuah chhuah a ngai. Thing phun tam aiin, phun tawhte a puitlin ngei theina tura enkawl leh chumi lama ṭan lak a pawimawh tawh zawk mahin a lang. Thing phun tihtawp tur a ni chuang lo a, la phun zel tho tur a ni ang; awmze nei zawka kal a ngai a ni ber.

Thing phun tawh zinga tam tak chu miin an paltlang tamna lai, kawngpui kama phun a ni a, tibuaitu leh tichhe theitu a tam zual avangin uluk taka enkawl leh venhim zui a ngai hle tih a chiang. Sorkar sum tam tak hmanna kan thing phunte hi a puitlin ngei theih nan enkawl leh ven zui lam ngaih pawimawh zual a ṭul tak zet a ni.