Mizo ṭhalaite ṭan mar a ngai

Vawiin June 14 hi thisen petute chawimawina ní, World Blood Donor Day a ni a, khawvel ram eng emaw zatah hman a ni dawn. India ram chhungah leh Mizoramah pawh hmun hrang hrangah hman a ni dawn a, thisen pe ṭhate hnenah lawmman/chawimawina hlan a ni ang.

Thisen petute chawimawina ní aṭang hian thisen petute hlutzia hre thar ila a duhawm hle. Khawvela mithiam berte pawhin thisen an la siam chhuak thei lo a; miin thisen a mamawh chuan petu an awm ngei a ngai. Thisen petu an awm loh chuan thisen mamawhtu chu thi mai thei a ni; thisen petute an hlu tak zet. Thisen petute hian chawimawi leh lawmman beiseia pe an ni lo a, mahse, chawimawi an phû em em.

Thisen pek hi 'pek tawh' a awm thei lo. Thisen pek tawh chu hman zawh zel a ni a, thisen mamawh an awm thar zel a, an tam tial tial bawk. Chuvangin, thisen pek zel a ngai a, uar tial tial a ngai bawk a; Mizo mipui, a bikin ṭhalaite tan ṭan mar reng a ṭul.

Mizoram sorkar pawhin thisen pek chungchang hi a ngaihven lehzual a ṭul. Thisen pek leh a kaihhnawih (blood transfusion) atana sum leh bungraw mamawh tam ber chu sorkar laipuiin a tum a ni a, state sorkarin tum a nei ve mang lo. Central 'thilpek' ah innghat lo thei lo kan nih rualin, eng emaw buai a awm palha invên nan leh thisen pek kal dan a buai loh nan tlem azawng tal state budget-ah sum dah theih ni se a ṭha hle ang.

A thlâwna thisen pekah Mizote kan harh viau tawh laiin, nachâng hre lo tam tak an la awm a, inzirtirna uar taka kalpui zel a ṭul. Thisen pe tura mite zirtirna leh fuihna lama hmalakna atan state sorkar hian sum ruahman thei se, hma kan sawn lehzual ang. Damlote'n an mamawh hun taka thisen an dawn theihna tur leh, a thlâwna thisen pek a pun zel theihna tura thil pawimawh a ni.