YMA hlutna sawi nêp theih a ni lo

Vawiin June 15 hi YMA Day a ni a, Mizorama khua leh veng tinah lawm a ni dawn. YMA Day hlim leh nuam taka hmang turin YMA branch hrang hrangte duhsakna kan hlan e.

V Thangzama chuan, 'Chanhai riangvaite puitu, thlafam lusûnte hnêmtu, Kristian êng chu an lo chhí, duhaisam chu hei ngei hi,' a lo ti a; YMA nihna a sawifiah ṭha hle.

Mi ṭhenkhat chuan YMA hlutna a tlahniam hret hretin a ngai a ni thei a, YMA-a tel pawimawhna leh ṭulna hre lo pawh an pung tial tial niin a lang. Mahse, Mizo hnam tana YMA hlutna hi a tlahniam lo a, a zual zel zawk emaw tih tur a ni.

Hun a danglam a, Mizo ram leh hnam tana YMA ṭangkai dan pawh a danglam ve hret hret. Hun hmasa lama YMA hmalakna eng eng emaw chu tunah chuan tih a ngai tawh lo; chutiang bawkin, tun hmaa la tih ngai loh, tuna tih ngai ta, nasa taka bawhzui leh thawh ngai a awm bawk. YMA hlutna hi tun hma deuha a tih ṭhin ang aṭanga teh a rem lo.

YMA awm hmain Mizote'n mitthi an lumen a, lusún an thlamuan a, thlânte an lo lài tawh ṭhin a; Mizo zia a ni. Hengte hi Mizo nihna anga kan tih zel tur a nih rualin, YMA hi mi hûi khawmtu a ni a, YMA kaihhruaina hnuaiah lo chuan buaithlak a awm ṭhin. YMA hi a din tirh aṭangin khawhar chhungte'n an thlamuanpui ber pawl a ni tih hi phat tur a awm lo.

Mi chhumchhia leh rethei zawkte khaidingtu chu YMA a ni a, chhiat tawhnaa chhanchhuah hna leh chhawmdawl hna thawktu pui ber chu YMA a ni. Ruihhlo a hluar apianga mipuiin an ṭah-awh chu YMA bawk a ni. YMA hlutna hi sawi nêp theih a ni lo.

Mizo mipui hian YMA a tlakhniam kan phal tur a ni lo a, a mualpho tur kan venpui tur a ni. YMA a chak lehzual theih nan leh hma a laknaahte mi tin hian kan theihna zâwn ṭheuhah ṭan kan lo la ve tur a ni.