AMC hotute an insawifiah dawn em?

AMC-a eptu corporator-te chuan tun hnaia press conference an neihah, AMC-a sorkarna chelhtute'n property tax sumte ward fund hman tur an dawn kim ngai loh thu te, AMC-a sum awmte chu Aizawl tana ro tling siamna tura hman aiin, an party mite invulhna atana hman an ngai pawimawh zawka an ngaih thute an sawi.

Financial year 2023-24 khan property tax aṭanga sum hmuh aṭangin ward tin tan cheng nuai 480 sem tur a nih laiin nuai 285 chiah sem a ni a, cheng nuai 195-in a kim lo. Kum hmasa lamah pawh an hmu kim lo tawh ṭhin tih an sawi a ni.

Eptu councillor-te'n press conference meuh neia AMC kal dan dik lo an puan ngai khawpa thil a awm hi a zia lo hle. An thu puante hi a dik a nih chuan AMC sorkar hi a kal dik lo tihna a ni a; sum eirûkna emaw, councillor-te inthlima tute emaw duhsakna uchuak a awmah mipui chuan an ngai ngei ang.

Property tax kalpui ṭan tirh aṭangin chhiah lut zinga 80% chu mipui tana hman lêt leh tur a nih thu an lo sawi tawh ṭhin a, chu chu ward fund tiin, councillor/corporator-te hnenah inzat ṭheuhin an sem ṭhin.

AMC sorkar kal mekah corporator-te ward fund tur sum tam tak AMC thuneitute'n an pe kim lo nia sawi hi AMC sorkar hian sawifiah ngei a bâ a ni; a chhan chu - mipuiin chhiah an pek khawm, property tax sum hmuh a ni tlat. He thil hi 'serious' tak zet a, sawifiah mai bakah, kum liam taa sum pek kim lohte chu mipui tana hman turin corporator-te hnena sem leh ngei hi an tih âwm tak a ni.

AMC hi Aizawl khawpui enkawltu a ni a, a hmalakna zau viau lo mah se, a pawimawh hle hlawm. AMC dan, thil tih, hmalakna leh hnathawh tawhte enin, Aizawl mipui zingah AMC duhkhawp lotu, dâwihzep titu leh nêp titu tam tak an awmin a hriat. AMC hi Aizawl khawpui tan a ṭha titu nge, ṭha lo titu tam ang, tih hi ngaihtuah tham fé a ni. AMC sorkar hotute an ṭan a ngai tak zet e.