College zirtirtu 'qualify' lote engtin?

Mizoram University Research Scholars’ Association hruaitute chuan Mizoram sorkar college-a zirtirtu a nghet loa thawk (casual/part time) zinga mi 30 chu college-a zirtir hna thawk tura danin a phût ang thiam nei lo an nih thu June 13, 2024 khan Higher & Technical Education (HTE) Minister an hrilh.

Sorkar college-a zirtirtu nghet lo zingah qualification-a tling tawk lo mi 30 an awm mek tih hi MURSA hruaitute hian RTI Act tlawhchhana zawhna chhanna aṭanga an hriat a ni a; Mizorama college zawng zawngah zirtirtu 'qualify' ngei dah a nih theih nan hma la turin HTE Minister an ngen.

College-a zirtirtu ni tur hian mithiam tak nih a ngai a; UGC thu angin, university leh college-a zirtirtu ni turin master degree-ah 55% aia tlem lo hmuh bakah, National Eligibility Test (NET), State Level Eligibility Test (SLET) leh State Eligibility Test (SET) zinga a eng emaw ber paltlang nih a ngai. Ph.D nei tan NET/SLET paltlang kher a ngai lo thung.

Mizo ṭhalai zingah Ph.D nei te, NET/SLET/SET paltlang tawhte mi tam tak an awm; chutih laia college zirtirtu ni tura thiamna neih ngai nei kim lo zirtir hna thawk mi 30 lai an awm hi a zialo hle. Mizoram zirna tihniamna a ni thei a, thiamna sang zawk neih tuma bei ṭâng ṭângte rilru tihnualtu a ni thei bawk.

College-a thawk mek zinga thiamna neih ngaia tling lo mi 30-te hi part time/casual an nih avang maiin an qualification-ah sorkarin a namnûlin a ngaihhnathiam tur a ni lo. Mizoram zirna leh Mizo ṭhalai tam tak hma lam hun hril thei a ni. A ngheta thawk an ni emaw, a nghet loa thawk an ni emaw, zirlaite zirtirtu an nih miau avangin thiamnaa tling ngeite chauh lâk tur a ni ang.

College zirtirtu, an thiamnaa tling lote hi sorkarin an hna aṭanga a chawlhtir a ṭul a, chawlhtir an nih chuan an hmun ruak hnawhkhah pawh a ṭul ang. Tunah hian Mizorama college-te an châwl mek a, academic session thar ṭan hma ngeiin thil dik lo awm hi chinfel ni se; zirtirtu qualify lote chawlhtirin, a thlaktu tur qualify ngei lâk ni teh se.