Tualthihna leh Mizoram

Tun hnaiah Mizoramah tualthihna chi hrang hrang a thleng a, a ṭhente chu ruihhlo vang nia ngaihte a ni a, a ṭhen chu lirtheia chetsualna vanga thite an ni a, a ṭhente chu mi kut tuara thite leh chhan hriat lohte an ni hlawm.

Tualthihna a thlen hian tun hma chuan a khaw pumin a nghawng ṭhin a, an thih dan a rapthlak deuh phei chuan ram pumah a thang chhuak ṭhin. Tunah erawh tualthihna hi ngaiah kan nei ta emaw tih mai tur a ni a, mipui pawh min ṭhawng vak tawh lo a, police leh sorkar lam pawhin an ngaimawh ta vak lo emaw tih theih turin thil a awm mek.

Tun hmaa kan hriat ngai loh thihna rapthlak tak tak a thleng ta fo a, a vanduai deuhte phei chu an thih chhan pawh hriat loh an awm hial. Mi ṭhenkhat chu mi kut tuar nia rinhlelh, a kutthlaktu hriat chhuah lohte leh lirtheiin an chil hlum nia hriat a chiltu tlan bo ta daih te an awm. Hengte hi tun hma deuh kha chuan Mizorama thil thleng ngai lo a ni a, tunah chuan a thleng ta fo mai.

Hei hi ngaia neiha ngawih bo mai chi a ni hauh lo a, tualthihna chhui chhuah kawngah police-te'n tun aia chak zawka ke an pen a ṭul a, tualthihna leh khawtlang sualna veng turin tlawmngai pawlte pawhin ṭan an lak thar a ṭul takzet a ni.

Tun ang zela tualthihna hi a tam chhoh chuan Mizoram hi hmun him lo takah a chang mai ang tih a hlauh-awm a, hel awm lohna hmun ralmuang tia sawi ni si hi chhan dang avangin hmun ralṭi tak leh nunau tana him lo takah a chhuak palh ang tih a hlauhawm khawp mai.

Social security hi a chhiat chuan sorkar a chak lo tihna a ni ṭhin a, hei hi hre rengin sorkar lam pawh tun aia an ṭan a ngai a; 'khawvel ṭhang zelin a ken tel' ti zawnga thlir loin khawvel ṭhang zelah hian ram him leh nuam zawk siam tumin police lamin ṭan la se, tualthihna chhui chhuah kawngah police-te'n ṭan la se, Mizoram nuam zawk i din ang u.