Change

Planning & Programme Implementation department leh All Mizoram Farmers Union (AMFU) ṭangkawp chuan, ram neih dan kalhmang siamṭhat leh buh leh bâl thar chhuah tam zawk theih dan tur dapna chungchanga inrâwn-khawmna an buatsaih a; Planning minister chuan, "Kan pi leh pute tih dan, kum za aia tam kan hman tawh hi system thar hmanga kan thlak a hun. Kalphung tharah chuan kan ṭhalai tam tak hna thawh tur nei lote hian lo neitu hausa nih tumin an thiamna hmangin lo neitu nih an châk tawh dawn a ni," a ti.

Hmasawnna a thlen dawn hi chuan thil a inthlakthleng a ṭul ṭhin a, kan tih ṭhinte kalsana tih dan thar kan neih a ṭul. Ei leh bar dapna kawngah mai ni lo, hringnunah hian thil a inthlak danglam loh chuan a ngai rengin kan awm a; midangin hma an sawn si avangin a ngai renga awmte hi hnungtawlh ang tho kan ni. Mizote hi ei leh bar kan zawn dan kawngah hian a ngai rengin kan awm a, kan chhehvel state-te'n tunlai thiamna an hmang ṭangkai tawh si a, hnungtawlh ang maia awmin kan la hnufual bik hle.

Kan ramah eng ang thlai pawh a ṭhat duh thu te, awmze neia buh leh thlai kan chin chuan hlawk tham khawpa thar theih a nih thute sawi a ni ṭhin a; nimahsela tun thlengin state dangte thlai tharah kan innghat a, buhfai ni se hmun dang aṭanga a lo luh loh chuan kan ṭam a ni mai. Mizoram mipui tam zawk kuthnathawka eizawng kan ni chunga kan intodelh thei miah lo hi chu kan lo neih dan kan thlak ngam a hun tawh takzet a ni.

NLUP hi chumi atana hmanraw ṭha ber tura ngaih ni mah se, kum eng emaw zat NLUP-in min luhchilh chungin ei leh bar kawnga kan intodelh sawtna hmuh tur a tam lo hle a, a sum hman ral a ṭhathnem tham em avangin khawilaiah emaw chuan hlawk-pui awm bawk mah se, a ram pumin danglamna a thlen phak meuh lo.

Mizo lo neih dan, pi leh pute aṭanga kan kakpui dan ringawt hi kan rin chhung chu he ram hi a intodel lo mai ang tih a hlauhawm a; tlang rama cheng hnam dangte pawhin lo hal loa buh leh thlai an thar theih avangin entawn ngam ila, thil inthlak danglam a thleng a nih loh chuan ei leh barah Mizote hi ṭhenawmte chawm kan ni reng ang tih a hlauhawm.