Ram kang ven

Champhai District Fire Prevention Committee chuan, sorkarin lo hal hun a bituk bawhchhiate chu hrem ngei ni se an ti a, hetihlai hian ram kang ven kawnga tiṭhate chawimawina pek an rel bawk.

Mizoramah hian dan leh thupek lekkawh ṭhat loh avangin thil tisualtute an huangtau a, a tidik lo tih chiang pawh 'khawngaihna' leh 'ngaihdamna' nen kan in en avangin hrem lohin an chhuak fo. Mihring khawsakhonaah hian inngaihdam chu a tel ngei tur a ni a, nimahsela danin ro a rel theih loh tur khawpa in ngaihdam leh inhriatthiam kan ching hi thil ṭha ber niin a lang lo.

Ram kang veng turin sorkarin ṭan a la a, lo hal hun fel takin a bithliah a; nimahsela lo hal hun ni loa lo halte leh ram tikangtute pawh hrem lohin an chhuak leh mai ṭhin a, a pawi takzet a ni. Ram kang ven kawngah kan thawh hlawk lo a nih pawhin a tikangtu ni lo tura ṭan tlan a ngai. Ram tikangtu hi hrem theih a ni a, ram tihkan hi thil hlauhawm tak a ni bawk.

Mizoramah heti khawpin ram kan hal chereu nasa a, mahni lo tur bak tikang hi kum tin an awm a; nimahsela ram tikangtu hrem an nih thu hriat tur a tlem hle. Miin ram a tihkan chuan hrem theih a ni a, lo neitu khawsak harsa zawk a nih vang ringawtin danin a ngaidam lo a; mi tam zawkin mei lam sialin kangmei chhuak tur an veng thei a, heti chunga ram lo tikangtute hi chu an thlavang hauh tur pawh a ni lo ang.

Ram kang kan veng duh a nih tak tak chuan hemi kawnga a thawk ṭhate lawmman pek a, ram tikangtu an chhuahte dan ang taka hrem ngei hi tihmakmawh a ni ta.