Zirna ngaih pawimawh versus Zirtirtu lâk

School Education Minister chuan, Mizoramah zirna a tlahniam nasa chu a vei thu sawiin, "Ṭan lakna tur a tam a, zirna hian hmun sang chang leh se la, zirlaite hi kan ram nghahfâk an nih avangin khawtlangin i duat thar ang u," a ti. 

Mizoram sorkarin zirna siam ṭhat tuma ṭan lâk duhna a nei hi thil lawmawm tak a ni a, kan ram zirna ber a tlak hniam chuan ram hmabak hi a ko hle. Kan zirna hi siam ṭhat a nih a, zawi zawia hma kan sawn chho a nih chuan tuna kan ramin harsatna a tawh tam takte hi sut kian theih a ni ngei ang. 

Zirna siam ṭhat kan sawi mek lai hian kan sorkarin zirtirtu a lâk thar dan erawh ngaih a tiṭha lo a, advertisement chhuah loa a ruk arala che ang maia zirtirtu 91 zet an lo la mai kha a mak khawp mai. Kan ram hruaituten zirtirtu la tura an sawipuina thu ziakte kha a chhiar pawh hrehawm khawp a ni a, "Kan iptepui banna," tihte leh, "Ka duhsak zawng," tihte an la hman miau avangin kan zirna hi a ṭha thar thut lo a nih pawhin a mak lo ang. Kan sorkar hian zirna siam ṭhat a duh tak tak chian zirtirtu lam aṭangin an siam ṭhat a ngai a, dan ang thlapa diltu zinga a thiam thiam am lâk ngam hunah zirna siam ṭhat hi a takin a kalpui ngam tihna a ni chauh ang.