Mizoram sorkar leh sawhthing

Chief Minister hoa June 17, 2024-a sorkar hotute ṭhukhawm chuan sawhthing lei, hralh leh sâwngbàwl dan tur leh chung atana sum chungchangte an ngaihtuah a; sawhthing leina atan sum a ṭul huna hman turin January-May inkarah minimum support price pek an rêl.

Ṭhutkhawmah hian CM chuan, ZPM party-in thlai thar lei an intiam - sawhthing, aieng, hmarcha leh hmunphiahte an lei ngei ngei dawn tih a sawi a, "Thlai thar palite lei hi kan tihlawhtling ngei ngei dawn," tiin a sawi tih sorkar thuchhuahin a tarlang.

Tuna sorkar lai hotute'n thlai thar lei an tum zingah sawhthing hi a pui ber, kut hnathawktute pawhin hma an lak natna ber a ni a, an thar huna ṭha tak leh man taka an hralh hun hi kut hnathawktute nghahfâk a ni. Chumi a hlawhtlin ngei theihna tur hawi zawnga CM-in thu a sawi hi an tan chuan a thlamuanthlak hlein a rinawm. Chutih rualin, thu mai a la ni a, a hlawhtlin tak tak hun Mizoram mipuiin an thlir mek.

Tuna sorkarna chelh mektu ZPM party hian kum 2018 inthlan hma aṭang tawhin sawhthing an aupui nasa a, mi tam tak chuan ZPM leh sawhthing an hmehbel hial tawh. Mipui, a bik takin thingtlang mipuite'n ZPM an thlan tlin chhan lian ber pawh sawhthing a ni ngeiin a lang.

Mizoram chhak leh thlang, chhim leh hmar kil tinah kut hnathawktute'n sawhthing an chíng suau suau a; sawhthing chìnna hmunte chu khaw ṭhenkhatah phei chuan sawhthing hmun pawh ti lo a, 'ZPM hmun' an tih hial khawpa thingtlanga kut hnathawktute'n ZPM sorkara beisei an neihna a ni.

An beisei anga sorkar a che lo a nih a, an beisei anga an hralh thei lo a nih ngat chuan an tan a na tak zet dawn a, an rûm tlawk tlawk ngei dawn. Kut hnathawktute beiseina hi sorkar hian a hlawhchhamtir thiang lo a, engti kawng zawng pawhin a tihlawhtling ngei tur a ni ang.