Zangnadawmna dik lo a awm em ni?

Lawngtlai District Land Owers Association chuan, Kaladan Multi Modal Transit Transport Project (KMMTTP) kawngpui siam meka an ram lak a nih avanga zangnadawmna pek thuai phûtin tun hnaiah hnathawktute an dang.

He kawngpui pawimawh tak ni tur hna hi ṭha taka an zawh hun chuan Mizoram tan a ṭangkai dawn a, sumdawnna kawngpui pawimawh a nih piah lamah inkalpawhna atan pawh a ṭang-kai hle ang. He kawngpui siam mek hian harsatna a tawk zauh zauh a, tunah hian a ram neitu nia inchhalte'n zangnadawmna hmuh thuai an phut avangin hnathawktu lam an dang mak a ni.

Thil mak tak chu heti teh thuta ram neitu nia inchhal an pung hluai mai hi a ni. Mizoram PWD hotute sawi danin, KMMTTP kawng siamnaah hian a tira ram enfiahnaa ram neitu dik tak nia hriat mi 165-te chu zangnadawmna cheng nuai 927 pek a ni tawh a; mahse, a tira tel lo mi dang 800 velin ram nei nia an insawi leh avangin Gauhati High Court-ah petition an thehlut a ni. High Court thuchhuak angin, ACB-in zangnadawmna diltu mi 800 zinga a zatve vel dilna chu enfiah tlaka ngaiin an enfiah a; chumi hnuah chuan Lawngtlai DC, district collector ni bawk chuan an thil hmuh dan report chu Mizoram sorkarah a thehlut a, thil inmil lo ṭhenkhat hmuh chhuah a nih avangin enfiah leh tura tih a ni.

Mizoram hmun dangah pawh sorkar project lian tham kalpui a nih dawn hian zangnadawmna phuttu hi an pung hluai ṭhin a, tuna KMMTTP kawng siamah pawh hian thil rinhlelhawm a awm. A tira an enfiaha lang lo mi 800 zet lo lang hi chu engti zawng mahin a dik thlap theiin a rinawm lo a, he kawngpui sialna hmun zau zawng nena ngaihtuah hian ram neitu mi 800 zet awm theihna tur ni pawhin a lang lo.

Hetihlai hian he kawngpui sial mekin mimal ram an laksak a nih tak tak chuan dan angin zangnadawmna hi an hmu ngei tur a ni a, a tira tih hmaih zingah ram neitu dik tak an awm a nih chuan an ram man hu hi an hmu tur a ni. Chutiang ni lo, zangnadawmna lak theih a ni tih hriaa dawt hmanga ram nei chawp an awm a nih chuan sorkarin dim lo se, hnathawh kallai tibuai thei tura zangnadawmna phuttute inlar fo mai hi a zialo takzet a ni.