Mizo ṭhalaite tan chona

Mizo ṭhalai, central (civil) service-a luh tum, beiseiawm bikte sorkarin a puih dan tur chu tun hnai khan chief minister hoa ngaihtuah a ni a, beiseiawm bikte chu exam tura an inbuatsaihna senso zawng zawng sorkarin a tumsak (full sponsorship) turin an rêl. CM chuan, Mizo ṭhalai zingah central service-a lut an tlem tulh tulh vangin ṭan lâk a ṭul thu a sawi a, "Mizo ṭhalaite hian India ram zau zawka rual el pha a, rual khûm pha an nih theih nan tun aṭanga ṭan lak a ngai a ni," a ti.

Central ser­vice-a tlin tuma inbuatsaihte zingah Mizo ṭhalaite tluka sorkar aṭanga puihna dawng ṭha hi an tam lo mai thei a, state sorkar mai ni lo mi ṭhahnemngai ṭhenkhatte chuan sum leh pai bakah thil dang hmangin heng mite duhsakna hi an lantir mek a ni. Tun hnaiah Mizote central service-ah an tling tlem tawlh tawlh a, hei hian nakin zelah nghawng ṭha lo tak a neih theih dawn avangin sorkar pawhin ṭan a la a ni. 

Mizo ṭhalaite pawh an harh a ngai a, heti taka mimal eizawnna tur thila sorkar a insengso huam ta hian tun hnaia UPSC exem-a kan tihchhiatzia a lantir thei awm e. Mimal eizawnna a nih rual hian hnam tan a pawimawh em em a, sorkar laipuia mi pawimawh ni phak sorkar hnathawk kan ṭhathnem na na na chuan a state pum leh a hnam pawhin a chhawr ṭangkai ṭhin a, hei hi hriain sorkar pawhin ṭan a la a ni. 

Sorkar hmasa aṭang tawh khan ṭhalaite tan rua­hmanna hrang hrang siam a ni a, UPSC exam-a prelims-a inziak tling chin tan phei chuan ruhmanna ṭha tak tak siam a ni chung pawhin Mizo ṭhalai zingah tling an tlem ta hle. Tunah phei chuan sorkarin an senso zawng zawng tumsak thlengin a inhuam ta a, hei hi ṭhalaite hian chonaah ngai se, sorkar inphalna hmang ṭangkai tura ke an pen a ngai takzet a ni.