VC/LC term pawh tawi tum a ni em?

Minister pakhatin tun hnaia Lungleia thu a sawiah, VC-te'n sorkar an thawhpui ṭhat duh loh avangin VC term pawh tâwi a nih mai theih thu a sawi niin All Mizoram Village Council Association chuan an hria a; an lungawi loh avangin press release hial siamin, Minister thusawiin anmahni a barakhaih thu an tarlang.

Village council leh local council member-te hi MP-te leh MLA-te ang thoin khua leh tui, kum 18 tling chinin dan ang taka vote hmanga an thlan tlinte an ni a; India ram democracy lungphûmah an pawimawh em em. MP-te leh MLA-te angin an huam chin a zau ve lo a, an thuneihna pawh a sang ve lo. Chuti chu ni mah se, democracy tun dinna atan MP leh MLA-te aiin an pawimawhna a nêp bik lo.

Mipuiin an vote hmanga an thlan tlin ve thote an nih miau avangin VC leh LC-te hi state sorkarin an nawm an mâkin an ching let tur a ni lo. Hun kal tawhah VC ṭhenkhat chu state sorkarin a sawisa mah maha ngaih theihin thil a lo awm tawh ṭhin; a zialo hle. VC-te ṭha taka an kal a, chak zawka hma an laka an thawh theih nan a ṭul apiangah sorkarin thlâwpin a tichak zawk tur a ni a; chu chu mipui, khawtlang leh ram tana ṭha tur a ni.

Mizorama VC tam tak zingah state sorkar thawhpui ṭha duh lo tlem azawng an lo awm a nih chuan, chu'ng VC-te chungah chuan state sorkarin ṭul a tih angin hma a la thei a, ṭhiah thleng pawhin action a la thei.

VC zinga tlem têin sorkar an thawhpui ṭhat duh loh avanga VC zawng zawng vaihma a, an zavaia term kal mek pawh tawi vek tumna a awm nia ngaih theiha Minister-in thu a sawi nia tarlan hi state sorkar, VC, khawtlang leh mipui tan thil ṭha ber a nih a rinawm loh. VC term tihtawi a ṭul a nih chuan, a aia chhan ṭha zawk awm thei se a ṭha.

VC leh LC term hman mek, kum 5 hi a rei deuha ngaitu mi tam tak an awm niin a lang a, sorkar hotute zingah pawh a rei mah maha ngai an awm tawh a ni mai thei. VC term a rei mah mah a nih chuan, sorkarin a titawi thei niin a lang. VC/LC term tihtawi ni dawn ta pawh ni se, chhan ṭha tak a awm ngei tur a ni a, VC/LC member ni mekte leh mipui tan pawha pawmawm tak a nih a ngai bawk.