Kan khaw tih dan

Mizorama khaw ṭhen­khatin Krismas leh Kumthar hmang tura an khaw mi hmun danga awmte haw hun an bituk a, an hun bituk hnua haw phal lo khua an awm a, an hun bituk hnua hawte in khung hrang tura ti an awm bakah, an khuaa Covid-19 hri a darh lohna tura an khaw bil tana ruahmanna siam an awm bawk. 

Village Level Task Force-te hi Covid-19 dona kawnga thawkrim leh tha thawh nasa an ni a, anni hian an khua an hriat chian ber avangin an khaw tana dan an siam hi tawngpawng sawisel vak a remchang lo mai thei a, chutih rualin khaw tinin mahni khaw bil ṭheuh dan an siam erawh chuan district thuneitute tan a luhaithlak hle ang tih a chiang. 

Tunah hian thingtlang khaw ṭhenkhat chuan khawpuia awm an khaw mite chu Krismas hmang tura haw an phalsak lo a, ṭhenkhatin hun bituk an nei a, Krismas hma kar hnih hnua haw lote haw phalsak loh thlengin ro an rel. 

Hei hian mahni khuaa haw tum thing­tlang mite mai a tibuai lo a, khawpuia an hnathawhnate'n an buai phah hle tawh zawk a; Krismas hma buai hun vanglai takin hna­thawktute'n an khua an pan a ṭul phah ta a ni. 

Hei hi DC lam­in ngun taka an bawhzui ngei a ṭul hmel a, sub division lamah SDO pawhin rang taka an huam chhung an zir chian a, ruahmanna an siam a ṭha hle ang. Sorkar dan siam sa piah lama mahni khaw dan zel hman a nih chuan mipuiin an tuar thei a, 'kan khaw dan' tih lam aia sorkar dan ngai pawimawh tur leh zawm tura ṭan lak ran a ṭul khawp mai.