Sikul dinhmun en ṭhat chungchang

School Education Minister chuan June 19-a press conference a neihah, sorkar term hmasa tàwp lama dinhmun sang zawka sikul 340-te dah tawh chu sorkarin a en ṭhat leh phawt dawn thu a puang a; dinhmun sang zawka sikul 340 dah chu inthlana tlin duh luat vanga tih niin a sawi.

Minister sawi danin, sikul 340-te an dinhmun mek aṭanga dinhmun sang zawka sorkarin September 2023-a a dah zingah sikul 197-in tlin ngai (criteria) an pha lo a; sorkar sikul (provincialise) ni tura dah 180 zinga 139-in criteria an pha lo. Provisional adhoc grant-in-aid dinhmunah sikul 52 dah a ni a, hei hi tun hmaa la awm ngai lo leh dan tlawhchhan awm lo a nia sawi a ni.

MLA inthlanpui kumah, inthlan dawn hnaiah state sorkarin sikul tam tak dinhmun sang zawka a dah huk ang chi hi a lo awm tawh ṭhin; kum 2008 leh 2023-ahte a tam zual niin a hriat. Hetianga thil tih hi ram leh hnam tana ṭha zawk tur leh Mizoram zirna tihhmasawn tumna vanga hmalakna a ang lo a, inthlan a nih dawn avanga vote hmuh ṭhat nan, mi tihlâwm tumna a ang mah zawk.

Inthlan dawn hnaia chawpchilh taka sikul tam tak dinhmun sang zawka dah ṭhin hi chìn tawh loh ni se a duhawm hle; a chhan chu - ram tana thil ṭha zawk tur leh zirnain hma a sawnna tur thil tih a niin a lang tlat lo.

Zirna tihhmasawnna atan te, ram leh hnam tana ṭhat zawkna atante sikul dinhmun siamṭhat a ngai a nih chuan, zirchianna mumal taka neih hmasak a ngai ang. Inthlan dawn hnaiha hnawhsasum taka thil ti loin, inthlan dawn hnai ni loah, uluk tak leh muangmara zir chian a, zirchianna mila hmalak chi a ni ang.

Sorkar leh Education Minister hmalakna hi thil ṭul tak, kan ram zirna kal zel tura ṭha zawk turah ngai ila. He hmalakna avanga lawm lo leh lungawi lo an awm nualin a rinawm; chuti chu ni mah se, thil ṭha leh dikah chuan sorkar hi huaisen kal rawh se.