Zan curfew leh a kenkawh hna

Mizoram sorkar chuan Covid-19 darh zel tur venna atan leh mipui himna turin zan dár 8:00 hnua pawn chhuah a khap a, khawpuia Pathiannia lirthei tlan chhuah a khap bakah Krismas leh Kumthar lawmnna program siam lo turin kohhrante a ngen bawk.

Sorkar hmalakna hi mi tam tak chuan a hnawk an tiin an sawisel nasa a, an eizawnna a tihbuai avang leh hunpuia sumdawngte inhralh hun a tihsukuk theih avang pawhin a ni ang, sawiselna a nasa hle. Hetihlai hian sorkar hi chuan mi tam berte ṭhat tlanna tur lam a ngaihtuah a ṭul a, mi ṭhenkhat tán harsatna thlen deuh mah se mipui nawlpui himna turin thutlukna a siam a ṭul fo. 

Hetihlai hian sorkarin Covid-19 darh lohna atana ruahmanna a siam (standard operating system) ṭhenkhat hi chuan ngaih pawimawh a hlawh tawk lo a, sorkar mi leh sâ indaih loh vang pawh a ni ang a, thuchhuah siamah a tawp san deuh der mai.

Aizawl khawpuiah chuan zan lama chhuah phal loh chu kawngpui lunlaiah ṭha taka kenkawh ni màh se veng tam takah a taka kalpui a ni lo a, Pathiannia lirthei veivah khap pawh kawngpui lunlaiah deuh chiah kalpui a ni a, hmun tam takah zalen takin lirthei a vei vak thei tho a ni. 

Sorkar hian thuchhuah a siam a nih chuan a bawhzui dan tur a ngaihtuah thlen a ngai a, sorkar tha chaknain a daih lo a nih pawhin Local Task Force-te nen ṭang kawpa thiam taka ruahmanna siam a fuh ang.

Kohhranin Krismas lawmna an siam theih loh lai hian hmun hrang hrangah chhung khat, ṭhianho leh kawtthler bil te tea inhmuh khawmna remchang an siam leh tho si chuan Covid-19 darh lohna tura ruahmanna hian a tum a ṭhelh thei a ni. 

Tun hnaiah lian tham loa inhmuh khawm (small gathering) hi Covid-19 theh darhtu lian (super spreader) a ni tawh an tih mêk lai hian Mizoram sorkar pawhin ṭan la thar thei se a lawmawm ang.