Ṭhalai pawlte leh taksa hriselna

Mizoram Ṭhalai Kristian Pawl (MṬKP) chuan June 19, 2024 zingah khan Mizoram hmun hrang hrangah 'Hriselna atana tlân' an huaihawt a, ṬKP member ṭhahnem tak an tel.

ṬKP chuan an rorelna sangah, 'Hriselna chungchanga ṭhalaite'n hma kan sawn theih nan hmalak ni se' tiin an rêl a; chumi bawhzui chuan 'Hriselna atana tlân' an buatsaih ta a ni.

Mizorama kohhran ṭhalai pawl zinga member ngah tak ṬKP-in ṭhalaite hriselna an ngai pawimawh a, an rorelna sangah ṭhalaite hriselna tur hawi zawnga hmalak an rêl hi a lawmawm a; rah ṭha tak chhuah ngei se a duhawm. Kohhran ṭhalai pawl dangte pawhin an member, ṭhalaite'n hriselna ṭha zawk an neih theih nan ṭan la ve thei se, ram leh hnam tan a hlu ngawt ang.

Khawpuiah a ni emaw, thingtlangah a ni emaw, tunlaiah Mizo ṭhalaite an meng rei tlangpui tawh a, zanlai dar 12 meng thleng ziah an ni fur tawh a, dar 1, dar 2 thleng rawka meng ṭhin pawh an tam tawh. Meng rei si, awm âwl bawk si, tui ṭha ṭha ei bawk site an tam a; taksa tana nun dan phung hrisel lo a ni. Tunah an taksain la tuar lo mah se, a tawrh hun a la awm ngeiin a rinawm.

Hetiang hi Mizo ṭhalai tam tak nun dan a ni a, tam tak chu kohhran ṭhalai member, inhmang tak takte an ni. Chuvangin, kohhran ṭhalai pawlte hian an member-te thlarau damna chauh ni loin, taksa hriselna pawh ngai pawimawh se, hriselna lam hawi inzirtirna an nei tam a ṭul.

Taksa hrisel neih hi a pawimawi em em mai a, taksa a hrisel loh chuan thlarau nun pawh a chak thei lo an ti ṭhin. Chuvangin, kohhran ṭhalai pawlte hian an member, Mizo ṭhalaite'n hriselna ṭha zawk an neih theih nan eng kawng emaw tala hma an lak a ṭul a ni.