Nitin kan eikhawp chaw

Agriculture minister chuan, Mizoram chhunga thlai thar chhuahte hlâwk zawka kalpui turin sorkarin Vegetables & Fruits Market Chain a duan thu leh, Mizoramah ni tin mamawh hâwp khawp thar chu an tum bulpui a nih thu a sawi a, "Kan tapchhak záwla kan ni tin mamawh hâwp khawp tal thar chhuah hi kan tum bulpui ber a ni," a ti. 

Tun hnaia MJA hruaitute nen an inkawmnaah Agricul­ture minister chuan, "Kan rama buh chìn theihna hmunte chiang leh zuala chhin­chhiahna kalpui a ni. Land Leasing Act kan nei dawn a, kut hna­thawktute an taima a, kan thar chhuahte a hralhna a ṭhat phawt chuan an inthawk hlum lo chauh ang. Chutiang chuan kal kan tum a ni," a ti.

State puitling kan nih hnu, Mizo pa ngei chief minister a nih a, minister leh sorkar office-a mi pawimawh zawng zawng deuhthaw Mizo pa an ni chungin kan ram hi kawng hrang hranga a intodelh loh piah lamah ei leh barah pawh a la intodelh lo a, hei hian kan ramah harsatna hrang hrang a thlen ṭhin tih kan hria. Tunah sorkarin ṭan lak a tum a, kan ei khawp tal thar chhuah tumna a nei hi a lawmawm takzet.

Mizorama thil pawi ber ṭhin chu sorkarin kal tum dan fel tak a nei lâwk ṭhin lo hi a ni. Tuna sorkarna vawnfung chelhtu MNF-te pawhin kum hnih dawn ro an rel hnuah an 'tum' an la sawi chho ṭan mek a, tunah chuan a tiha tih hun mipuiin an nghak ta. Tuna kan chief minister ni ta, MNF president hian an sorkar huna Vai buh kan ei tawh loh tur thute kha a lo sawi tawh a, khatiang hmathlir (vision) nei tan chuan sorkar tûka hnathawh dan tur ruahmanna lo neih tawh âwm tak a nihlaiin, sorkar pawhin kal tum dan a la sawi chho mek chauh a ni. 

Engpawhnise buh leh bala intodelh a, kan ei leh bar tur tal thar chhuah hi a pawimawh takzet a, hemi thlen diktir thei tura tuna hnathawh hi a hun ta. Agriculture minister hian hnathawh tak tak a tum tih a lang thei a, a ṭhahnemngaihna hi a takin chang thei se; thil dangah hma kan sawn duak duak thei lo palh a nih pawhin, nitina kan ei leh bar tur thar chhuak thei state-ah tal kan ram hruaitute hian min chhuah thei se a lawmawm ngawt ang.