Khawpui aṭanga zirtirtu sawn chhuah

School Education Minister chuan June 19, 2024-a a pisaa press conference a neihah khawpui leh thingtlanga sikulah zirtirtu dinhmun a inthlauh avangin zirtirtu, Aizawla awm rengte chu sawn chhuah an nih dawn thu a sawi. Khawpui aṭanga zirtirtu sawn chhuah chu mipuiin an ngam loh ring mah se, an ngam tih a sawi chiang a ni.

Education Minister thusawi avanga lawm lo leh lungngai lâwk, sorkarin a tih tak tak hlau an awm nual mai thei a, mahse, mi tam tak an ni lo ang. Mipui náwlpui, Mizoram mipui aṭanga 99% vel lai chu an lawm zawkin a rinawm.

Tun hma aṭang tawhin khawpuia sikulte leh thingtlanga sikulte zirtirtu neih zata an inthlau lutuk hi Mizoram zirna leh mipui buaina a ni a, chingfel ngam sorkar kan la nei thei meuh lo niin a lang. Khawpuia sorkar sikulah zirtirtu an tam a, an indaih em em a, sikul ṭhenkhatah phei chuan zirlai aiin zirtirtu an tam zawk maha sawite a awm.

Thingtlangah erawh chuan private school ṭha a awm tam lo a, awm pawh ni se, khawsak harsa tak tak an tam avangin private school-a lut thei lo, sorkar sikula lut lo thei lo tam tak an awm. Chuvang chuan thingtlanga sorkar sikulah zirlai an ṭhahnem tlangpui a, zirtirtu an indaih lo em em thung. He harsatna hi sorkarin a chinfel hun mipuiin an nghakhlel em em a ni.

Education Minister-in, "Aizawla awm reng bikte chu sawn chhuah an ni dawn a, kan buaipui mek. Kan ngam loh ring an awm a, kan ngam khawp ang," tia a sawi hi a taka a thlen hun mipuiin an thlir reng a; a hlawhtlin ngei an beisei.

Zirtirtu khawpuia awm zinga tam tak hi chu tun hmain sorkarin a sawn chhuak ngam lo ṭhin niin a lang a, tuna Education Minister-in 'Kan ngam khawp ang' a tih hi an ngam leh ngam loh mipuiin an lo thlir reng dawn a, a hlawhtlin ngei an beisei avangin sorkar hi huaisen taka a kal a ngai a ni.