CYMA nungcha humhalh

Central YMA chuan thu­chhuah siamin, Mizoram hmun hrang hrangah sangha fuan hun lai a ni a, nungchate an him theih nan YMA sub-headquarters, group leh branch-te'n theihtawp chhuahin hma an la mek tih an sawi a, "Kum 2020-ah pawh he hmalakna hi chhunzawm zel a ni. YMA leh khawtlangin lui dung kan humhalh mek laiin, tun hnaiah khawih an ni hi CYMA chuan a dem tak zet a ni," an ti. 

Nungcha hum­halh kum hial lo puang tawhtu CYMA-in nungchate an him theihna tura hma an la chhunzawm zel hi a lawmawm a, chutih laiin thuchhuah tlanglawn tak siam piah lamah hian tih theih an nei ngei ang. Branch YMA-te'n an huam chhunga nungchate chunga pawi khawihtu an mante an hming an puanzar chang a awm ṭhin a, phalna nei loa sa kapte leh dan phal loha lui dunga nungcha suasamte an duh loin mimal hming pawh an tarlang mai ṭhin. 

Zep thu a cheng lo a, tun hnaiah Mizorama rorel tura mipui thlan chhuah mi 40 zinga tel, MLA pakhat chu luia sangha humhalh lai bomb hmanga suasamtu zingah a tel niin khaw pakhatin an puh a, a thlalakte hial social media lamah a darh chuai chuai a ni. Hetiang thil hi politics-a inbeihna chang thei mai a nih ṭhin avangin CYMA lam tan pawh fimkhur a ṭul a; chutih rualin ram puma nungcha humhalh kum lo puang tawhtu pawl zahawm tak hi a ṭul hunah chuan che chhuak turah mipuiin an beisei ngei ang. 

Central YMA hian an thuchhuahah nungcha humhalhna kawngah sorkar leh khawtlangte nena thawhhona ṭha tak an neih thu an tarlang tel a; hei hi tun hnaia thil thlenga dan phal loha sangha mantu zingah MLA a lo tel ve nia khawtlangin an puhte nen hian a inhmeh lo hle a ni. 

Engpawhnise CYMA hi pawl zahawm tak a ni a, tih tur chin leh tihâwn chin pawh a thliar thiam ṭhin a, nungcha humhalhna kawngah pawh hian a tih tur chin chu ṭha takin a ti chho zel ang a; Mizorama nungchate an himna turin he pawl hi a pawimawh chhunzawm zel dawn a ni.