AR insawn leh Mizoram sorkar

Union Home Minister chuan chawlhkar liam taa Mizoram Chief Minister nen an inkawmnaah, Aizawl lailia Assam Rifles battalion headquarters chu Zokhawsanga sawnna turin thutlukna siam a nih tawh thu leh an insawn ngei dawn thu a lo hrilh tih tarlan a ni.

Khawpui laili aṭanga AR sawn chhuah chungchang hi political party zingah political khelhna atana hmang an lo awm tawh ṭhin. Ram hruaitu ṭhenkhat phei chu an lo ṭawng sual pheng phung tawh a, Mizoram mipui laka thangṭhat lâk an tum lutuk vang a ni mai thei.

Mizorama sorkarna chelh mek party hian khawpui laili aṭanga AR battalion hqrs sawn chhuah chungchang hi thupui takah an nei lêm lo niin a lang a; mipui hriatah sawi an nei vak lo a, sorkar laipuiah pawh na takin an nawr lo a niin a hriat.

Aizawl khawpui lailia AR battalion headquarters sawn chhuah hi a ṭhatna tam tak a awm thei a, sawn loa an awm zel a ṭhat zawkna pawh a awm ṭeuh mai thei. Mi tam takin insawn chhuak vek se an duh laiin, insawn chhuak vek tura duh lo zawk mi eng emaw zat an awm ve bawk âwm e.

AR battalion hqrs hi sawn chhuah a ni dawn a nih pawhin, an insawn chhuah hmain an kalsan hmun zawng zawng a him theih nan, mimal kuta a luh loh nan state sorkar a inbuatsaih a, a inrin lâwk a ṭul. Mizoram sorkar a la inpeih lo a nih phei chuan, central lamin insawn chhuak turin ti mah se, tihkhawmuan dan zawn a ṭul hial zawk ang.

Assam Rifles-te hi Central sorkarin insawn chhuak tura a tih chuan an insawn chhuak mai ang a, state sorkar pawhin tih tur a neih ve chinah ṭha takin bawhzui se. AR-te hi engtik hunah pawh insawn dawn se, Mizoram sorkar hi a inpeih hmasak a ngai a ni.