Kan mualphona HIV/AIDS

Mizoram State AIDS Control Society (MSACS) bultumin December 1 khan Aizawlah World AIDS Day hman a ni. National AIDS Control Organisation (NACO)-in a zirchianna thar ber, India HIV Estimates, 2019 kumina an tihchhuahah chuan, India rama kum 15-49 inkar (adult HIV prevalance) HIV positive percent-ah Mizoram chu 2.32% niin, a sang ber. Pahnihna chu Nagaland (1.45%) a ni a, pathumna chu Manipur (1.18%) a ni. Kum tin mi 1,000 zela kái thar awm zat (HIV incidence)-ah pawh India ramah Mizoram chu a sang ber a, mi 1,000 zelah mi 1.18-in an kái anga chhût a ni. 

Heti taka Mizorama HIV positive an pung chak hi chu a state pumin ngun taka ngaihtuahna sên a ṭul takzet a, harsatna leh ṭul dang tam tak awm bawk mah se he thil buaipui tluka ṭul hi a tam lo khawp ang. Tun ang zela HIV positive hi an pung a nih chuan he state hian harsatna thuk zawk a tawng dawn tih a lang reng a, chu harsatna nasa tak kan hmaa awm thei laka kan fihlim dan tur chu ngaihtuah a hun ta. 

HIV/AIDS sawi hi chuan tute emaw hemi lama thawktute kuta dah mai a awl a, remchang taka lo lang kohhran pawh dem mai a awl hle. Dem tur kan zawng dawn a nih chuan tuna sorkarna vawn fung chelhtute mai ni lo, Mizorama sorkarna lo siam tawh zawng zawngten mawh an phur thui hle a, HIV a darh zel lohna tura kaihhruaina ṭha tak leh rintlak zawk hi sorkar hian a duh tak tak chuan a kalpui thei ngeiin a rinawm. 

Tunah chuan kan nih nih kan ni ta a, mawhpuh tur leh dem tur zawn a hun tawh lo a, hun harsa tak kan tawng mek tih kan pawm a ngai. Hetiang dinhmuna kan tluk tawh hnua tute emaw tehnaa 'happiest state' kan nihte kan lo la uanpui a nih chuan zah a hun a, HIV/AIDS-a kan harsatna tawh mek hi a ram pum mualphona angin pawm ngam ila, he harsatna kan hmachhawnna turah pawh nasa zawkin kan thawk thei deuh mahna?