Consultant pahnih ruat a ṭul kher em?

Mizoram sorkarin June 21, 2024 khan hun chhung bituk awm loin School Education department consultant a dah thar a, state sorkara secretary-te tlukpuiah dah a ni a, thla khatah lawmman/hlawh Rs 35,000 pek tura tih a ni.

June 24, 2024 khan sorkarin kum khat chhung atan Mizoram Secretariat Service pension-a chhuak tawh mi pakhat chu Land Revenue & Settlement department consultant-ah a ruat bawk a, state sorkara joint secretary tlukpuiah dah niin, lawmman/hlawh thla khatah Rs 32,000 pek tura tih a ni.

Hun rei tak lo thawk tawhte sawi danin, tun hmain Education department-ah consultant an la awm ngai meuh lo niin a lang a; LRS department-ah chuan department-a hun rei tak officer nia thawk tawh, a pension hnua consultant tih hming vuaha rawih a awm tawh thung.

Department pahnihah officer rank sang tak tlukpuia consultant pahnih ruat hi ram tana thil ṭha zawk tur nge, a ṭhat zawkna awm chuang lo tih hi ngaihtuah tham fê a ni. Sorkar hotute chuan ṭha an ti a, an ruat a; mipui hian ṭha an tihpui ang em tih erawh sawi a har.

Consultant dah a nih avang hian sorkarin sum eng emaw zat a sên belh ngei dawn. Tun hmaa la awm ngai meuh lo a nih avang leh consultant awm lo pawha kal theih tho a nih avangin an tana sorkar sum sên belh tur hi a uiawm viauah a ngai theih a, Year of Consolidation (inrenchem kum) puan nen phei chuan a inhmeh lo viauah a ngaih theih bawk.

Sorkarin sum sên belh dawn mah se, consultant-te avang hian Mizoram zirnain a ṭhat phah viau dawn a, hma a sawn phah hle dawn a nih chuan a ṭha a; ram neih dan kalphung leh ram buaichuar lutuk chinfel nan a ṭangkai dawn a nih chuan a hlâwkah a ngaih theih bawk. Ramin hma a sawn phahna tur awm tak tak chuang si lo a nih erawh chuan sum sên thlawnna leh party/mimal induhsakna mai a ni ang.

Department pahnihah hian enkawltu minister leh officer ṭha tak tak an awm sa a, chuvang chuan consultant ruat hi thil ṭul loah ngaih theih a ni ve ang. Consultant-te hi an ṭangkai viau thei a, department mite nen an thawhho thiam tâwk lo a, an thawhho ṭhat theih loh phei chuan hna kal lai tibuaitu an ni thei bawk.